Վլադիկավկազցի գործարար Օլեգ Գուսովի, որը մահացել էր այն բանից հետո, երբ մի կում էր արել «Ջերմուկ» հանքային ջրի շշից, մահվան փաստով քրեական գործը դադարեցվել է, «ՌԻԱ Նովոստիին» տեղեկացրել է ընտանիքի փաստաբան Այրաթ Խիկմատուլինը։

2024թ. փետրվարին Վլադիկավկազի 65-ամյա բնակիչ Գուսովը «Ջերմուկ» հանքային ջրի շշից մի կում խմելուց հետո կերակրափողի այրվածք էր ստացել. ջրի փոխարեն քացախ էր եղել։ Նա մահացել է հիվանդանոցում։ Հարուցվել է քրեական գործ՝ անվտանգության պահանջներին չհամապատասխանող ծառայությունների մատուցման վերաբերյալ, ինչն անզգուշությամբ հանգեցրել է մարդու մահվան (ՌԴ Քրեական օրենսգրքի 238-րդ հոդվածի 2-րդ մասի «գ» կետ): Գուսովի այրին եւ դուստրերը հայց են ներկայացրել ընդդեմ հանքային ջրեր արտադրող ընկերության՝ «Ջերմուկ Գրուպի» եւ անհատ ձեռներեց Իգոր Իսուպովի: Դեկտեմբերի վերջին Վլադիկավկազի Սովետսկի շրջանային դատարանը հայցը չի դիտարկել։

Հունվարի 20-ին ՀՀ էկոնոմիկայի նախարարությունը հայտնել է, որ երկրի սննդամթերքների անվտանգության տեսչական մարմինը ռուսական կողմին է ներկայացրել «Ջերմուկ» հանքային ջրի միջազգային չափանիշներին համապատասխանության ապացույցներ։ «Ջերմուկ Գրուպ»-ը Գուսովի ընտանիքի հայցը չհիմնավորված է անվանել։

«Քրեական գործը կասեցվել է։ Որքան գիտենք, հետաքննությունը հարցումներ է ուղարկել Հայաստան դեռ անցյալ տարվա մայիսին, սակայն ամբաստանյալն անտեսում է հարցումները, թեեւ ընկերությունը պետք է շահագրգռված լինի լիարժեք հետաքննության եւ իր հեղինակության պաշտպանության մեջ»,- ասել է Խիկմատուլինը։

Փաստաբանի խոսքով՝ գործի դադարեցումից հետո ուսումնասիրվել են նյութերի պատճենները, եւ պատրաստվել է քաղաքացիական հայց։

«Հայցի չափը սահմանվել է տնօրենների կողմից, պետք է հասկանալ, թե ինչ ծախսեր են եղել ավիացիայի, տուժածին Վլադիկավկազից Մոսկվա տեղափոխելու, ինչպես նաեւ Սկլիֆոսովսկու անվան գիտահետազոտական ​​ինստիտուտում բուժման համար: Բայց ընտանիքն առաջին հերթին ոչ թե փողի, այլ արդարության կարիք ունի»,- ավելացրել է նա։