նախընտրելի դարձնել
Իրանի փոխնախագահ Մոհամմադ Ջավադ Զարիֆի գրասենյակը հայտնել է, որ նա չի պատրաստվում որևէ բանակցություն վարել ԱՄՆ պաշտոնյաների հետ Շվեյցարիայի Դավոսում, որտեղ նա մասնակցում է Համաշխարհային տնտեսական ֆորումի (WEF 2025) տարեկան հանդիպմանը, հայտնում է IRNA-ն։
Չորեքշաբթի օրը հրապարակված հայտարարության մեջ Զարիֆի գրասենյակը կոչ է արել անհատներին և լրատվամիջոցներին զերծ մնալ Իրանի փոխնախագահի այցի մասին լուրեր տարածելուց:
Ինչպես ավելի վաղ հայտարարվել էր, Զարիֆը՝ ռազմավարական հարցերով փոխնախագահը, Դավոս է մեկնել Համաշխարհային տնտեսական ֆորումի հրավերով։
«Դավոսում բանակցություններ չեն եղել ԱՄՆ-ի կամ որևէ երրորդ երկրի հետ այս հարցի շուրջ, և ակնհայտ է, որ ցանկացած բանակցություն ընթանալու է բարձրագույն իշխանությունների (Իրանի) որոշման հիման վրա և նորմալ դիվանագիտական շրջանակներում՝ առաջին հերթին արտաքին գործերի նախարարության միջոցով»,- նշել են Իրանի փոխնախագահի գրասենյակից։
Իրանի նախկին արտգործնախարար Զարիֆը երկուշաբթի օրը մեկնել է Թեհրանից՝ մասնակցելու Դավոս 2025-ի հանդիպմանը, որն անցկացվում է «Համագործակցություն հանուն ինտելեկտուալ դարաշրջանի» թեմայով։
Հանդիպումը համախմբում է աշխարհի տարբեր երկրների ղեկավարներին՝ լուծելու միջազգային և տարածաշրջանային հիմնական խնդիրները:
