Իրանը և Թուրքիան մտքեր են փոխանակել տրանսպորտի և տարանցման ոլորտում համագործակցության ընդլայնման շուրջ։

Թուրքիայում Իրանի դեսպան Մոհամմադ Հասան Հաբիբզադեի և Թուրքիայի տրանսպորտի և ենթակառուցվածքների փոխնախարար Էնվեր Իսկուրթի հանդիպման ընթացքում կողմերը քննարկել են տրանսպորտի և տարանցման ոլորտում Թեհրանի և Անկարայի համագործակցության ընդլայնման ուղիները, գրում է Tehran Times-ը։

Այս հանդիպմանը քննարկվել են երկաթուղային, ավտոմոբիլային, օդային և ծովային տրանսպորտի տարբեր ոլորտներում երկու երկրների հարաբերությունների զարգացման ծրագրերն ու հեռանկարները, տեղի է ունեցել մտքերի փոխանակում։

Հանդիպմանը քննարկվել է նաև Իրանի և Թուրքիայի սահմանային անցակետերում բեռնատարների երթևեկության վերջին խնդիրը։ Իր տարածք մուտք գործող իրանական առևտրային մեքենաների համար վառելիքի հարկի արտոնությունները վերացնելու Թուրքիայի վերջին որոշումը լուրջ վեճերի տեղիք է տվել:

Այս որոշումը, որն ուժի մեջ է մտել 2024 թվականի դեկտեմբերի 29-ից, բեռնատարների իրանցի վարորդներին ստիպում է վճարել վառելիքի չափազանց մեծ հարկեր, որոնք կազմում են Թուրքիայում սպառման հարկի հատուկ տոկոսադրույքի 155 տոկոսը, գրում է Mehr-ը։ 

Բեռնատարների իրանցի վարորդները, որոնք արդեն բախվում են ուշացումների սահմանային անցակետերում, հիմա էլ ենթարկվում են լրացուցիչ ֆինանսական բեռի, որը կարող է խաթարել տարածաշրջանում առևտրի դինամիկան: Այս քայլը պատասխան է Իրանի «լիքը բաք» քաղաքականության, որի համաձայն, Իրանից մեկնող օտարերկրյա բեռնատարները պետք է իրենց բաքերում վառելիքի քանակին համարժեք մաքսատուրք վճարեն՝ վառելիքի մաքսանենգության դեմ պայքարելու նպատակով:

Թեև Թուրքիան հիմնավորում է իր որոշումը փոխադարձությամբ, սակայն այն խաթարում է երկու երկրների միջև երկկողմ առևտրային հարաբերությունների ամրապնդմանն ուղղված շարունակական ջանքերը, հաղորդում է իրանական լրատվամիջոցը։