ՆախընտրելիԱյսպես կոչված «Զանգեզուրի միջանցքի» մասին նույն կարծիքը միայն Իրանն ու Հայաստանն ունեն։ Այս հարցում մենք հակասություններ չունենք։ Այս մասին փետրվարի 6-ին լրագրողների հետ հանդիպման ժամանակ հայտարարեց Հայաստանում Իրանի արտակարգ և լիազոր դեսպան Մեհդի Սոբհանին։
«Եվ միայն Իրանն է աջակցություն ցուցաբերում Հայաստանին, որը դեմ է «Զանգեզուրի միջանցքին»։ Տարածաշրջանի երկրներից Հայաստանի կողքին է միայն Իրանը։ Այսպես կոչված «Զանգեզուրի միջանցքը» հակասում է թե՛ Հայաստանի, թե՛ Իրանի շահերին»,- նշեց դեսպանը։
Նա պարզաբանեց, որ Իրանը ներկայացրել է իր դիրքորոշումը թե՛ Ռուսաստանին, թե՛ այլ երկրներին։
Սոբհանին ասաց, որ Իրանը դրական է գնահատում այն փաստը, որ Իրանի հետ սահմանը վերահսկվելու է հայ սահմանապահների կողմից։
Նրա խոսքով՝ իմաստ չունի, որ մի երկրի սահմանները վերահսկվեն մեկ այլ երկրի սահմանապահների կողմից։
