Մենք պատրաստ ենք հանդիպել Երևանի «Հաղթանակ» թաղամասի բնակիչների հետ և լուծումներ գտնել նրանց խնդիրներին։ Այս մասին փետրվարի 12-ին կառավարության ժամին ասաց Հայաստանի տարածքային կառավարման և ենթակառուցվածքների նախարար Դավիթ Խուդաթյանը։

Նա տեղեկացրեց, որ «Հաղթանակ» թաղամասում խողովակների փոխարինման շինարարական աշխատանքների ավելի քան 70%-ն ավարտվել է, և այդ աշխատանքները կվերսկսվեն մարտին։

Նրա խոսքով, աշխատանքները նախատեսվում է ավարտել 2025 թվականի հուլիսին։

Հիշեցնենք, որ փետրվարի 10-ին «Հաղթանակ» թաղամասի բնակիչները փակել էին ճանապարհը և հայտարարել, որ երկար ժամանակ է, ինչ չեն կարողանում սեփական հողերի հետ կապված գործարքներ կատարել և չեն կարող փոխել գյուղատնտեսական նշանակության հողերի կարգավիճակը։