նախընտրելի դարձնելՀայոց ցեղասպանության ժխտումը քրեականացնող օրինագծի ընդունումը կարող է թանկ նստել Ֆրանսիայի վրա, քանի որ թուրքական ԱԳՆ-ն պատրաստել է գործողությունների պլան, որը նախատեսում է խզել Փարիզի հետ շփումները քաղաքական, տնտեսական եւ մշակութային ոլորտներում: Փորձագետների գնահատականներով` դա ֆրանսիական ընկերություններին բազմամիլիարդ վնաս է խոստանում, գրում է «Կոմերսանտը»:
Նախագծի քվերակությունը տեղի կունենա դեկտեմբերի 22-ին:
Այդ օրինագծի լուրջ վտանգների մասին նախազգուշացրել է նաեւ Թուրքիայի վարչապետ Ռեջեբ Էրդողանմը, ով անձամբ է դիմել Ֆրանսիայի նախագահ Նիկոլա Սարկոզիին` օրինագծի քվերակության չդնելու խնդրանքով:
Թերթը, վկայակոչելով թուրքական ԱԳՆ-ի աղբյուրները, հաղորդում է, որ պատասխան գործողությունների ծրագրում ենթադրվում է դիվանագիատական հարաբերությունների մակարդակի իջեցում եւ կապերի խզում բոլոր ոլորտներում: Անկարայի կողմից նման սխեմա արդեն կիրառվել է Իսրայելի պարագայում` կապված «Ազատության տորմիղի» միջադեպի հետ:
«Եթե փաստաթուղթն ընդունվի, երկու երկրների միջեւ տնտեսական հարաբերություններին նկատելի վնաս կհասցվի»,- զգուշացրել է Թուրքիայի առեւտրային պալատների եւ բորսաների ղեկավար Ռիֆաթ Հիսարջիկլօղլուն:
Թերթը եզրակացնում է, որ Ֆրանսիայի վրա նրա սկզբունքայնությունն իսկապես կարող է շատ թանկ նստել: Երկու երկրների միջեւ ապրանքաշրջանառությունը կազմում է 11,5 մլրդ եվրո: Փորձագետները ֆրանսիական ներդրումները թուրքական տնտեսությունում գնահատում են 6,5 մլրդ եվրո:
«Հարաբերությունների վատթարացումը կանդրադառնա նաեւ Թուրքիայի վրա: Հավանաբար, հենց այդ նպատակով է թուրք գործարարների դեսանտ մեկնել Փարիզ, ովքեր ֆրանսիացի գործընկերներին մտադիր են բացատրել օրինագծի ընդունման հետեւանքները»,-եզրակացնում է պարբերականը:
