Երեւանի քաղաքապետարանը պատրաստ էր առատ տեղումներին, բայց, չնայած դրան, մայրաքաղաքի մի շարք վարչական շրջաններում՝ Արաբկիր, Աջափնյակ, Կենտրոն, Ավան, Նոր Նորք եւ Զեյթուն, խնդիրներ են առաջացել, որոնք պայմանավորված են եղել, մասնավորապես, նրանով, որ ձնամաքրման սարքավորումները հայտնվել էին խցանման մեջ։ Այս մասին փետրվարի 24-ին կայացած խորհրդակցության ժամանակ ասել է Երեւանի քաղաքապետի խորհրդական Կամո Արեյանը՝ մեկնաբանելով առատ ձյան պատճառով քաղաքում առաջացած երթեւեկության կոլապսը։

Նրա խոսքով՝ ձյան տեղումների պատճառով Երեւանում չորսժամյա խցանում է գոյացել, որի մեջ խրվել է նաեւ ձնամաքրման տեխնիկան։ «Բացի այդ, տեխնիկայի աշխատանքում անսարքություն է եղել, որն ազդել է Արաբկիրում եւ Զեյթունում աշխատանքների վրա»,- ասել է Արեյանը։

Սկզբում, ինչպես նշել է քաղաքապետի խորհրդականը, մաքրվել են մայրաքաղաքի գլխավոր փողոցները։ Սարի թաղի, Նորագյուղի եւ Քանաքեռի առանձնատների հատվածում մաքրման աշխատանքները պետք է իրականացվեին փոքր տեխնիկայի միջոցով, քանի որ մեծ տեխնիկան ուղղակի չէր կարող տեղ հասնել։ Պաշտոնյան վստահեցրել է, որ բոլոր համատիրություններին ավազի եւ աղի պաշարներ են տրամադրվել։ Ընդ որում՝ տեղումներից երկու օր առաջ։

Բացի այդ, մաքրվել եւ մշակվել են բոլոր հիմնական փողոցներն ու մայթերը: Սակայն բակերի հետ կապված խնդիրներ են առաջացել։ «Համատիրությունները չեն կարողացել գլուխ հանել իրենց բակերի մաքրման գործից»,- խոստովանել է քաղաքապետարանի ներկայացուցիչը՝ այն ֆոնին, որ բնակիչներն ամեն ամիս զգալի գումարներ են ծախսում այդ ամենի համար։

Այս առնչությամբ նա ընդգծել է օրենսդրական փոփոխությունների անհրաժեշտությունը։ «Գործին միացել են նաեւ կանաչապատման ծառայության աշխատակիցները։ Նրանք օգնել են մաքրել ստորգետնյա անցումների, այգիների եւ բնակելի շենքերի աստիճանները»,- տեղեկացրել է Արեյանը։

Բացի այդ, աշխատանքները շարունակվում են մերկասառույցի հեռացման եւ մայթերի մաքրման ուղղությամբ: Պաշտոնյան նշել է, որ ձնամաքրման տեխնիկայի աշխատանքը սովորաբար ավարտվում է մարտի 1-ին։ Սակայն ստեղծված իրավիճակից ելնելով հրահանգել է երկարացնել մինչեւ մարտի 31-ը։ Քաղաքապետի խորհրդականը նշել է նաեւ Երեւանի աղբահանության եւ սանիտարական մաքրման հիմնարկների բարեփոխման անհրաժեշտությունը։ «Մեզ նոր տեխնիկա է պետք, որը կարող է հասնել քաղաքի բոլոր հատվածները եւ մաքրել փողոցները»,- եզրափակել է Կամո Արեյանը։

Իր հերթին, Երեւանի քաղաքապետ Տիգրան Ավինյանն ասել է, որ ճանապարհատրանսպորտային պատահարների 80 տոկոսը տեղի է ունեցել ամառային անվադողերով մեքենաների պատճառով։ Նա նաեւ մեղադրել է ապահովագրական ընկերություններին դանդաղկոտության մեջ։ Նրա խոսքով՝ աննշան բախման դեպքում վարորդները մի քանի ժամ սպասել են ապահովագրողների ժամանելուն, ինչի արդյունքում կիլոմետրերով խցանումներ են առաջացել:

 «Այս համակարգը պարզապես աղետ է Երեւանի համար, քանի որ ամեն անգամ, երբ նման միջադեպ է լինում, ժամերով դադարում է երթեւեկությունը։ Սա խնդիրներ է ստեղծում ոչ միայն քաղաքի երթեւեկության, այլեւ մեր տեխնիկայի համար, որը խրվում է խցանումների մեջ»,- դժգոհել է քաղաքապետը։

Այսպիսով, մայրաքաղաքի իշխանությունների գնահատմամբ, որին անցյալ ուրբաթ օրը հաջողվել է կայունացնել իրավիճակը միայն դպրոցներում եւ բուհերի մեծ մասում դասերի չեղարկման եւ գործատուների կողմից աշխատողների առյուծի բաժնի՝ հեռավար աշխատանքի անցնելու շնորհիվ, փլուզման մեղավորը բոլորն էին, բացի իրենցից։