Հինգշաբթի օրը Գերմանիայում դատարանը երկու աֆղանցիների դատապարտել է մի քանի տարվա ազատազրկման՝ Շվեդիայի խորհրդարանի վրա հարձակում և օրենսդիրների սպանություն ծրագրելու համար՝ ի պատասխան Ղուրանի օրինակների այրման, հայտնում է Associated Press-ը:

Յենայի բարձրագույն շրջանային դատարանը տղամարդկանց մեղավոր է ճանաչել, ի թիվս այլ բաների, արտերկրում ահաբեկչական կազմակերպությանն անդամակցելու կամ աջակցելու և սպանություն կատարելու դավադրության մեջ:

Նրանցից մեկին՝ 30-ամյա ամբաստանյալին, դատարանը դատապարտել է հինգ տարի վեց ամիս, իսկ մյուսին՝ 24-ամյա երիտասարդին՝ 4 տարի 2 ամիս ժամկետով։ Պատիժները դեռ կարող են բողոքարկվել։

Մինչ իրենց ձերբակալությունը, երկուսն էլ ապրում էին Գերայում՝ Գերմանիայի արևելյան Թյուրինգիա նահանգում, ընկերներ էին և արմատականացված էին ԴԱԻՇ-ի առցանց քարոզչության կողմից: Տղամարդիկ ձերբակալվել էին մարտին Չեխիայից վերադառնալիս, որտեղ նրանք անհաջող փորձ էին կատարել հրազեն գնել՝ ահաբեկչություն իրականացնելու համար:

Ըստ դատարանի՝ նրանք որոշ ժամանակ հսկողության տակ են եղել։ Ավելի վաղ գերմանական իշխանությունները մեղադրյալներին անվանել էին Իբրահիմ Մ. Գ. և Ռամին Ն.։