Իրանի խորհրդարանի (մեջլիսի) պատգամավորները հետ են վերցրել իրենց վստահության քվեն Իրանի էկոնոմիկայի և ֆինանսների նախարար Աբդոլնասեր Հեմաթիից։

Իրանի խորհրդարանում Ռեշթ ընտրատարածքի ներկայացուցիչ Ջաբբար Քուշակինեժադը Mehr լրատվական գործակալությանը հայտնել է, որ այն բանից հետո, երբ էկոնոմիկայի նախարար Հեմաթին չի կարողացել կրկին ստանալ խորհրդարանի վստահության քվեն, նա հեռացվել է իր պաշտոնից։

Իրանի խորհրդարանի անդամները հետ են կանչել Հեմաթիին տված իրենց վստահության քվեն՝  182 կողմ, 89 դեմ, մեկ ձեռնպահ քվեարկությամբ։

Մարտի 2-ին ավելի վաղ Իրանի էկոնոմիկայի և ֆինանսների նախարար Աբդոլնասեր Հեմաթին խորհրդարանում հայտարարություն է արել ազգային արժույթի արժեզրկման վերաբերյալ։

Հեմաթին խորհրդարան էր եկել՝ պատասխանելու որոշ օրենսդիրների հարցերին, որոնք դժգոհում էին նրա նախարարության աշխատանքից և տնտեսական իրավիճակի վատ կառավարումից: Իր նախարարին պաշտպանելու նպատակով իմփիչմենթի նիստին մասնակցել է նաև Իրանի նախագահ Մասուդ Փեզեշկիանը: Նախագահը բազմիցս կրկնել է, որ անձի փոփոխությունը էական փոփոխությունների չի հանգեցնի։

Իրանի սահմանադրության համաձայն, օրենսդիրները կարող են իմփիչմենթի ենթարկել նախարարներին, երբ անհրաժեշտ համարեն։ Իմփիչմենթի միջնորդություն կարող է ներկայացվել, եթե այն ունենա առնվազն տասը ստորագրություն։