ՆախընտրելիՎրաստանի խորհրդարանը դեկտեմբերի 23-ին արտահերթ նստաշրջանի ընթացքում հաստատել է երկրի Ազգային անվտանգության հայեցակարգը:
Ինչպես հաղորդում է «Նովոստի Գրուզիան», հայեցակարգին կողմ է քվեարկել խորհրդարանում ներկա 150 պատգամավորներից 111-ը:
«Վրաստանը երկրորդ անգամ է Ազգային անվտանգության հայեցակարգ հրապարակում, որն արտացոլում է երկրում կատարված փոփոխություններն առաջին փաստաթղթի ընդունման պահից, եւ դրանց ազդեցությունը ազգային անվտանգության առջեւ ծառացած մարտահրավերների, վտանգների եւ ռիսկերի վրա»,-նշվում է հայեցակարգի նախաբանում: Առաջին փաստաթուղթն ընդունվել էր 2005 թ. հուլիսին:
Նոր` 42 էջանոց հայեցակարգը բաղկացած է 5 գլխից: Առաջին գլուխը նվիրված է անվտանգության հարցերին, երկրորդը վերաբերում է Վրաստանի ազգային արժեքներին, երրորդն արտացոլում է ազգային շահերը, չորրորդը նվիրված է ռիսկերին, իսկ հինգերորդում խոսվում է «Վրաստանի անվտանգության քաղաքականության հիմնական ուղղությունների մասին»:
Նշենք, որ փաստաթղթում գլխավոր սպառնալիքների եւ մարտահրավերների թվում նշվում է Ռուսաստանի կողմից «Վրաստանի տարածքների օկուպացիան», «Ռուսաստանի կողմից նոր ռազմական ագրեսիայի ռիսկը», ինչպես նաեւ «Ռուսաստանի կողմից օկուպացված տարածքներում ահաբեկչական ակտերի կազմակերպումը»:
