նախընտրելի դարձնելԱյս փուլում Միացյալ Նահանգների և Իրանի միջև ընթանում են հույժ գաղտնի բանակցություններ։ Դրա մասին NEWS.am-ի «Ուժի գործոն» հաղորդման ժամանակ հայտնել է քաղաքական վերլուծաբան Արգիշտի Կիվիրյանը։
Ըստ նրա՝ դա Թրամփի մարտավարությունն է, որը սկզբում «հրահրում է» այս կամ այն կողմին, իսկ հետո բանակցությունների իրական հարթակ է ձևավորում։
«Սակայն Իրանը կոտրելն այնքան էլ հեշտ չէ, և նա նույնպես հասկանում է իրավիճակի լրջությունը»,- ընդգծել է նա։ Վերլուծաբանը կարծում է, որ այս գաղտնի բանակցությունների արդյունքից է կախված լինելու տարածաշրջանի ճակատագիրը։ «Իսրայելի համար, որքան էլ տարօրինակ է, ձեռնտու է Իրանի հետ ստվերային համագործակցություն հաստատել Եգիպտոսի և Թուրքիայի դեմ, որը Սիրիայում տեղի ունեցած իրադարձություններից հետո շատ մոտեցել է հրեական պետությանը։ Այսինքն՝ հասարակական հարթությունում Թեհրանն ու Թել Ավիվը կշարունակեն միմյանց վրա ցեխ շպրտել, մինչդեռ իրականում կարող են համագործակցել Թուրքիայի դեմ»,- նշել է նա։
Միաժամանակ Կիվիրյանը չի բացառել Թեհրանի դեմ ռազմական գործողությունը, սակայն այն վերջին տարբերակ է անվանել։ «Իրանի ամենամեծ խնդիրը տնտեսական խնդիրներն են, որոնք կարող են խթանել էթնիկական և կրոնական լարվածությունը: Այդ պատճառով Թեհրանը ստիպված է բանակցություններ վարել»,- հավելել է նա:
Ինչ վերաբերում է Ռուսաստանին, Թրամփը փորձում է Մոսկվային ներքաշել իր ճամբարը Չինաստանի հետ առճակատման համատեքստում՝ միաժամանակ լուծելով Իրանի և Հյուսիսային Կորեայի խնդիրները, կարծում է վերլուծաբանը։ «Սակայն Մոսկվան հասկանում է, որ Թրամփի թոշակի անցնելուց հետո Միացյալ Նահանգների նման քաղաքականության արդյունքում Ռուսաստանը կարող է միայնակ մնալ»,- եզրափակել է Կիվիրյանը։
