նախընտրելի դարձնել
Հայաստանի օմբուդսմենի գրասենյակը և ԱԺ մարդու իրավունքների պաշտպանության և հանրային հարցերի մշտական հանձնաժողովը քաղաքացիներից անընդհատ բողոքներ են ստանում տարբեր ժամանցի և սննդի օբյեկտներից երեկոյան ժամերին բարձր երաժշտության վերաբերյալ։ Այս մասին Ազգային ժողովում մարտի 21-ին համապատասխան թեմայով լսումների ժամանակ հայտարարեց ԱԺ մարդու իրավունքների պաշտպանության և հանրային հարցերի մշտական հանձնաժողովի փոխնախագահ, իշխող «Քաղաքացիական պայմանագիր» կուսակցության պատգամավոր Ռուստամ Բակոյանը։
Քննարկումներն ընթանում են պատգամավորների, ինչպես նաև կառավարության և տարբեր հասարակական կազմակերպությունների ներկայացուցիչների մասնակցությամբ։
Քաղաքացիները, ըստ պատգամավորի, դժգոհում են նաև շինհրապարակներից եկող աղմուկից։
«Խնդիրը տեղին է, և կան բազմաթիվ բողոքներ։ Դրանք ուղղված են թե՛ մեր հանձնաժողովին, թե՛ ՄԻՊ գրասենյակին։ Հայաստանի տարբեր բնակավայրերում հանրային աղմուկի հետ կապված բողոքները տարբեր են: Հատկապես հաճախ են նշվում մայրաքաղաքում տեղակայված սննդի և ժամանցի վայրերը։ Քաղաքացիները հատկապես ակտիվ են բողոքում գիշերային բարձր երաժշտության, շինարարական աշխատանքների արդյունքում առաջացած աղմուկի, բարձր աղմուկով ուղեկցվող տրանսպորտային միջոցների շահագործումից և, առհասարակ, համակեցության կանոնների բազմաթիվ խախտումներից»,- ասաց Բակոյանը։
