«Հայոց տուն» նախաձեռնությունը պետք է դառնա մեր ինքնության շարժիչ ուժը։  Այս մասին մարտի 27-ին «Հայոց տուն» նախաձեռնության մեկնարկի ժամանակ հայտարարել է Հայ Առաքելական եկեղեցու Արցախի թեմի առաջնորդ Վրթանես եպիսկոպոս Աբրահամյանը։

Նա կոչ է արել նախաձեռնության մասնակիցներին իրականացնել ծրագրեր՝ առաջնորդվելով հայ ժողովրդի շահերից բխող գաղափարներով։

Նրա խոսքով՝ հասարակության ամենակարեւոր հենասյուներն են հավատը, միասնությունը, առաքինությունը։ Նա ավելացրել է, որ այդ սյուները բխում են հայ ժողովրդի ինքնությունից եւ քրիստոնեական ակունքներից։ «Եթե մենք հավատարիմ լինենք այդ գաղափարներին, ապա հասարակությունն ուժեղ կլինի՝ անկախ արտաքին հանգամանքներից: Մեր ինքնությունը պետք է մեզ տանի ժողովրդի նպատակների իրականացմանը: Սիրո վրա հիմնված գաղափարները կարող են պետությունը վերածել դրախտային օջախի: Մեր ներսում շատ բան կա, որի մասին չենք կարող բարձրաձայնել, ինչը թույլ չի տալիս ամբողջությամբ հայտարարել այն ամենը, ինչը խորթ է մեր ինքնությանը»,- նշել է Վրթանես եպիսկոպոս Աբրահամյանը:

Նշենք, որ «Հայոց տուն» նախաձեռնության անդամներն են սոցիոլոգիական գիտությունների դոկտոր Գեւորգ Պողոսյանը, ՀՀ արտակարգ եւ լիազոր դեսպանի կարգավիճակ ունեցող Ռուբեն Կարապետյանը, պատմական գիտությունների դոկտոր Աշոտ Մելքոնյանը, բժշկական գիտությունների դոկտոր Արմեն Չարչյանը, արվեստագետ Արման Նուրը եւ այլ գործիչներ։