նախընտրելի դարձնելՍփյուռքում բոլորը մտահոգ են, բայց դարձել են անտարբեր, Ղարաբաղի կորստի պատճառով տառապանքի զգացում չունեն և իրենց այնպես են պահում, կարծես ոչինչ չի եղել։ Այս մասին NEWS.am-ին տված հարցազրույցում ասել է Ռուսաստանի հայերի միության նախագահ Արա Աբրահամյանը։
«Բոլորը դժգոհում են, բայց շատերը հույս ունեն, որ շուտով խաղաղություն կլինի, բայց նրանք չեն հասկանում, թե սա ինչ խաղաղություն է, ինչ գին ենք վճարելու դրա համար և որքան կտևի այս խաղաղությունը։ Բոլորը հոգնել են հակամարտությունից, երիտասարդների մահից, աղքատությունից ու ճգնաժամից, ուստի հույս ունեն Ադրբեջանի հետ խաղաղության պայմանագրի շուտափույթ ստորագրման վրա։ Բայց ի՞նչ գնով»,- նշեց նա։
Մեզ տանում են դեպի անդունդ
Աբրահամյանը նշեց, որ հայերին սպանում են, նրանցից ամեն ինչ խլում են, Արցախի նախկին ու ներկա նախագահները նստած են ադրբեջանական բանտում, ու հետո էլ փորձում են հայերին հրեշի տեսք տալ։
Նա համոզմունք հայտնեց, որ Հայաստանի ներկայիս իշխանությունների օրոք անհնար է հասնել Ադրբեջանից հայ գերիների ազատմանը։
«Ինչո՞ւ մոտ 500 ադրբեջանցիների հետախուզման մեջ չենք մտցրել մեզ սպանելու համար։ Հայաստանի բոլոր խնդիրները կապված են Փաշինյանի հետ։
Թուրքիան և Ադրբեջանը ցանկանում են ամբողջությամբ կործանել Հայաստանը, որպեսզի մենք չկարողանանք ոտքի կանգնել։ Մեզ տանում են դեպի անդունդ։ Ես արդեն ասել եմ, որ Փաշինյանի իշխանության գալով մենք թանկ գին ենք վճարելու, բայց հիմա վիճակը գնալով վատթարանում է։ Միաժամանակ, նա կորցնում է վստահությունը հայ հասարակության մեջ։ Եթե երկիրը տանենք փորձությունների ճանապարհով, կարող ենք կորցնել և՛ երկիրը, և՛ ազգը։
Մեզ սպանել են Բաքվում, Սումգայիթում, մեր գերիներին սպանել են Ադրբեջանում, բայց մենք չգիտես ինչու չենք կարող դիմել դատարան։ Փաշինյանը լսո՞ւմ է, թե ինչ է ասում Ադրբեջանը։ Ասում է՝ Զանգեզուրն ու Երեւանն իրենն են։ Փաշինյանն ասում է, որ ինքը պահանջ չունի, բայց չի՞ լսում, թե ինչ է ասում հակառակ կողմը»,- ընդգծեց Ռուսաստանի հայերի միության ղեկավարը։
Նրա խոսքով, Ադրբեջանի հետ խաղաղության պայմանագիրը խաղաղ կյանքի երաշխիք չէ, հատկապես, եթե այն ստորագրվի առանց միջնորդների։
ԱՄՆ-ի և Ռուսաստանի համար Հայաստանը կարևորություն չի ներկայացնում. մենք պետք է մեր համար մեծացնենք երկրի նշանակությունը
Նա վստահ է, որ ԱՄՆ-ի համար Հայաստանի գոյությունն ընդհանրապես նշանակություն չունի։
«Նրանք գիտեն, որ մենք կորցրել ենք Ղարաբաղը, և զարմացած են, այո, կան ամերիկացի սենատորներ, ովքեր այցելել են Ղարաբաղ և զղջում են կատարվածի համար, բայց նրանք ունեն իրենց խնդիրները, նրանց համար Հայաստանը շատ հեռու է և անհասկանալի, միևնույն ժամանակ, նրանք տարակուսած են»,- հավելեց Աբրահամյանը։
Նրա խոսքով, երբ Ուկրաինայում պատերազմն ավարտվի, Ռուսաստանը կսկսի իրեն այլ կերպ պահել, քանի որ շատ լավ գիտի թե՛ Ադրբեջանին, թե՛ Թուրքիային։
Բայց դա չի փոխում այն փաստը, որ Հայաստանը Ռուսաստանի համար կարևոր չէ, հավելեց նա։
«Ռուսները ցանկացած պահի պատրաստ են սահմանափակել իրենց ներկայությունն այստեղ, ասում են՝ եթե հայերը մեզ ասեն, մենք հենց վաղն առանց խնդիրների դուրս կգանք։ Ի՞նչ նշանակություն ունի Հայաստանը նրանց համար։ Ոչ մի»,- կարծում է Ռուսաստանի հայերի միության նախագահը։
Նա բացատրեց, որ Հայաստանին Ռուսաստանն ավելի շատ է պետք, քան Հայաստանը՝ Ռուսաստանին։
«Միևնույն ժամանակ մենք կարող ենք օգուտ քաղել Ուկրաինայում պատերազմի ավարտից և ռուս-ամերիկյան հարաբերությունների կարգավորումից։ Պետք չէ ասել, որ գնում ենք ԵՄ։ Մեր շահերը, անվտանգությունը և առևտրի հոսքը Եվրասիայում են։ Եվ եթե այսպես շարունակվի, ռուսները մի օր կասեն շնորհակալություն ու բազան կհանեն, կսկսեն մեզ գազ վաճառել հազար խորանարդ մետրը 800 դոլարով և նույնիսկ ավելին, իսկ ցորենը կսկսեն այլ գնով մատակարարել։ Հայաստանը միայնակ որպես երկիր չի կարող գոյություն ունենալ, դա անհնար է։
Միևնույն ժամանակ, մենք առաջին հերթին ինքներս մեզ պետք է պետք լինենք»,- ասաց Աբրահամյանը։
Ճգնաժամից դուրս գալու ծրագիր
Ճգնաժամային իրավիճակից դուրս գալու համար Աբրահամյանը ներկայացրեց մանրակրկիտ մշակված ծրագիր, որը պետք է հիմնված լինի միասնականության վրա։
Նա պարզաբանեց, որ Հայաստանում իշխանության պետք է գան մասնագիտական բարձր որակներով հայրենասերներ։
«Քաղաքական վերնախավը պետք է դառնան 35 տարեկանից բարձր մարդիկ, ովքեր գործի մեջ դրսևորել են իրենց հայրենասիրությունն ու պրոֆեսիոնալիզմը, այդպիսի մարդիկ կան ոչ միայն սփյուռքում, այլ նաև Հայաստանում, և մենք կենտրոնանալու ենք առաջին հերթին Հայաստանի կադրերի վրա։
Երկու տարվա ընթացքում մոտ 150 մարդ պետք է պատրաստենք։ Նրանք նախ պետք է սովորեն արտասահմանում, հետո վերադառնան ու 25 տարի աշխատեն Հայաստանում։
Անվտանգության ոլորտի համար մենք պետք է պատրաստենք մոտավորապես 15 անձնակազմ, որոնք երեք ամսով կմեկնեն ԱՄՆ, ապա Ֆրանսիա, Իսրայել, ապա Ռուսաստան։
Այս դեպքում նրանք հնարավորություն կունենան ուսումնասիրելու ամերիկյան կառավարման համակարգի բնութագրերը, հետո եվրոպական, իսկ հետո Իսրայելի համակարգը, որը լինելով փոքր երկիր, կարողացավ հզոր բանակ ստեղծել։ Հաջորդիվ այդ մարդիկ պետք է ուսումնասիրեն Ռուսաստանում կառավարման մեխանիզմները։
Ուսուցումն ավարտելուց հետո նրանք կվերադառնան Հայաստան և երեք ամիս կաշխատեն որպես պաշտոնյաների օգնականներ՝ նախարարի թեկնածուն կաշխատի գործող նախարարի հետ, իսկ ԶՈՒ ԳՇ պետի թեկնածուն՝ ԳՇ պետի հետ և այլն։ Երեք ամիս անց նրանք կղեկավարեն այն բաժինները, որտեղ վերապատրաստվել են։ Այս ամենը կտեւի երկու տարի»,- ասաց Ռուսաստանի հայերի միության ղեկավարը։
Ի՞նչ անել այս երկու տարվա ընթացքում
Նա պարզաբանեց, որ այսօր կան մարդիկ, ովքեր կարող են ստեղծել իրենց թիմը և պահպանել գոնե եղածը, նաև հիմք դնել, մինչև այդ 150 կադրերը գան իրենց փոխարինելու։
Աբրահամյանը հայտնեց, որ այս ծրագիրը Փաշինյանին կներկայացնեն կամ այն իրականացնելու կամ հրաժարական տալու կոչով։
Եթե նա հրաժարական չտա, ապա դրան կփորձեն հասնել առաջիկա ընտրություններում, պարզաբանել է Ռուսաստանի հայերի միության ղեկավարը։
Նա վստահեցրեց, որ քաղաքական ամբիցիաներ չի հետապնդում, քանի որ իր համար ավելի կարևոր է հայրենիքի ապագան։
«Մեզ պետք են բոլորը՝ անկախ քաղաքական հայացքներից և կարգավիճակից։ Մեզ համար չկա բաժանում «սևերի ու սպիտակների», այլ կան հայեր։ Մեր հասարակության խնդիրն այն է, որ մենք կորցրել ենք հավատն ու վստահությունը միմյանց նկատմամբ, ինչի վկայությունն է Գյումրիի ընտրություններին մասնակցությունը»,- եզրափակեց Աբրահամյանը։
