նախընտրելի դարձնել
Հայաստանում քննարկում են կաբելային հեռուստատեսության և ինտերնետային ալիքների հեռարձակմանն առնչվող հարցերի կարգավորման ուղիներն ու միջոցները։
Դրա մասին ապրիլի 8-ին ԱԺ կրթության, գիտության, մշակույթի, սփյուռքի, երիտասարդության և սպորտի հարցերի մշտական հանձնաժողովի նիստում Հեռուստատեսության և ռադիոյի հանձնաժողովի՝ 2024 թվականի տեսալսողական լրատվամիջոցներում տեղեկատվության ազատության գործունեության և վիճակի մասին զեկույցի ներկայացման ժամանակ հայտարարել է հանձնաժողովի նախագահ Տիգրան Հակոբյանը։
Եվրոպայում, ըստ նրա, արդեն մի քանի տարի է, ինչ կարգավորվում է ինտերնետային հեռուստատեսությունը։ Ճիշտ է, երբ օրական որոշակի քանակությամբ ժամեր են հեռարձակում, ունենում են որոշակի լսարան (բաժանորդների քանակ) և այլն։
«Նույնիսկ սոցիալական մեդիայի հարթակներն այնտեղ կարգավորվում են, մի բան, որի մասին Հայաստանում դեռ քչերն են մտածում։ Հայաստանում նման հեռուստատեսությունների և հարթակների աշխատանքը կարգավորված չէ։ Մինչդեռ դրանք արդեն գերազանցել են սովորական հեռուստաալիքներին թե՛ քանակով, թե՛ լսարանի թվով։ Հայաստանում կա ընդամենը 22 ազգային և մարզային հեռուստաալիք, և մոտ 40 հայկական ինտերնետային հեռուստաալիք։ Ընդ որում, հենց այնտեղ է ամենից հաճախ խախտվում հեռարձակման էթիկան, հնչում ատելության խոսք՝ hate speech։
Ի դեպ, Հայաստանում դրա իրավական սահմանումը դեռ չի մշակվել։ Դրա պատճառով վերջին մի քանի տարիներին հանձնաժողովը տանուլ է տվել գրեթե բոլոր հայցերը, որոնք նախկինում ներկայացրել էր նման հեռարձակողների դեմ»,- նշել է Տիգրան Հակոբյանը։
