նախընտրելի դարձնել
Թունիսի դատարանն ընդդիմության առաջնորդներին, գործարարներին և փաստաբաններին դատապարտել է 13-ից 66 տարվա ազատազրկման։ Նրանք մեղադրվում են պետական անվտանգության դեմ դավադրության մեջ։ Դատավճիռը շաբաթ օրը հայտնել է պետական TAP լրատվական գործակալությունը։
Ընդդիմությունը պնդում է, որ մեղադրանքները շինծու են, և դատավարությունը Թունիսի նախագահ Կաիս Սաիդի ավտորիտար կառավարման արտացոլումն է, հաղորդում է BBC-ն։ Իրավապաշտպան խմբերն ասում են, որ Սաիդը լիարժեք վերահսկողություն է իրականացրել դատական համակարգի վրա՝ 2021 թվականին խորհրդարանը և Բարձրագույն դատական խորհուրդը 2022 թվականին ցրելուց հետո:
Այս գործով պատասխանատվության են ենթարկվել 40 մարդ, այդ թվում՝ հայտնի քաղաքական գործիչներ, գործարարներ, լրագրողներ, գրում է Reuters-ը։ Ավելի քան 20 մարդ մեղադրանքների առաջադրվելուց հետո փախել է արտերկիր։
Իշխանություններն ասում են, որ մեղադրյալները, որոնց թվում են նախկին պաշտոնյաներ և հետախուզության նախկին ղեկավար, փորձում էին ապակայունացնել երկիրը և տապալել նախագահ Սաիդին: Սաիդը հերքում է իրեն բռնապետ լինելու մեղադրանքները և ասում է, որ պայքարում է քաոսի և կոռուպցիայի դեմ, որը տիրում է քաղաքական վերնախավում:
