նախընտրելի դարձնել
Մենք առաջարկում ենք հետաձգել անձնական եկամտահարկի հայտարարագրերի ներկայացման ժամկետը։ Այս մասին ապրիլի 21-ին Ազգային ժողովի նիստում Հարկային օրենսգրքում փոփոխություններ եւ լրացումներ կատարելու մասին օրինագծի քննարկման ժամանակ հայտնել է իշխող «Քաղաքացիական պայմանագիր» խմբակցության պատգամավոր, ԱԺ տնտեսական հարցերի մշտական հանձնաժողովի փոխնախագահ Բաբկեն Թունյանը։
Մասնավորապես, այս տարի հայտարարագիր ներկայացրածները մայիսի 1-ի փոխարեն կարող են ներկայացնել մինչեւ նոյեմբերի 1-ը, հաջորդ տարի հայտարարագիր ներկայացնողները կարող են ներկայացնել մարտի 2-ից նոյեմբերի 1-ը, հետագա տարիների համար հայտարարագրի ներկայացման վերջնաժամկետ կսահմանվի մարտի 2-ից հուլիսի 1-ը։
«Մենք փոխում ենք մայիսի 1-ը որպես օրենքով սահմանված վերջնաժամկետ՝ սահմանելով նոր, այս անգամ մինչեւ հաջորդ տարվա նոյեմբերի 1-ը, սա նշանակում է, որ այս տարի նախորդ տարվա եկամտահարկի հայտարարագիր ներկայացնողների համար հայտարարագրերի ներկայացման վերջնաժամկետը կլինի նոյեմբերի 1-ը։ Հաջորդ տարի այս տարվա եկամտահարկի հայտարարագիր ներկայացնողների համար վերջնաժամկետը կլինի նաեւ նոյեմբերի 1-ը, դրանից հետո հայտարարագրերի ներկայացման վերջնաժամկետը կլինի հուլիսի 1-ը»,- պարզաբանել է Թունյանը։
Նրա խոսքով՝ ներկայում արդեն շուրջ 35 հազար մարդ հայտարարագիր է ներկայացրել։ Խորհրդարանականը համոզված է, որ մարդկանց այդքան քիչ լինելու պատճառներից մեկն այն է, որ դեռեւս նույնականացման քարտ չունեն։
Որոշ քննարկումներից հետո խորհրդարանն առաջին ընթերցմամբ հավանություն է տվել օրենսդրական նախաձեռնությանը։ Օրինագծին կողմ է քվեարկել 63 պատգամավոր, 12-ը ձեռնպահ է մնացել։
