Հայոց ցեղասպանության 110-րդ տարելիցին ընդառաջ ընդդիմադիր «Հայաստան» խորհրդարանական խմբակցությունը հանդես է եկել նոր օրենսդրական նախաձեռնությամբ։ Այս մասին ապրիլի 22-ին Ազգային ժողովի նիստում ասել է ԱԺ վերոնշյալ խմբակցության քարտուղար, ՀՅԴ անդամ Արծվիկ Մինասյանը։

Օրինագիծը, մասնավորապես, նախատեսում է քրեական պատասխանատվություն Հայոց ցեղասպանության փաստը ժխտելու համար։

«Սա մի կողմից ազգային հիշողության, արժանապատվության եւ ինքնության խնդիր է, մյուս կողմից՝ մարտահրավեր Հայաստանի եւ հայ ժողովրդի թշնամիների կողմից։ «Յուրաքանչյուր ոք պետք է իր ընտրությունը կատարի»,- ասել է պատգամավորը։

Նա ընդգծել է, որ այս նախաձեռնությունն առաջին հերթին ուղղված է խորհրդարանական մեծամասնությանը, որը որոշումներ է կայացնում երկրի անունից։ Մինասյանը հույս է հայտնել, որ քննարկումների ընթացքում «Քաղաքացիական պայմանագիրը» հարգանք կցուցաբերի ազգային արժանապատվության նկատմամբ։