Մայիսի 11-ին իրանական պատվիրակության հետ բանակցությունների վերջին փուլի ժամանակ ԱՄՆ նախագահի բանագնաց Սթիվեն Ուիթքոֆը իսլամական հանրապետության արտաքին գործերի նախարար Աբաս Արաղչիին է փոխանցել ԱՄՆ գրավոր առաջարկը՝ Իրանի միջուկային ծրագրի շուրջ տարաձայնությունները լուծելու համար։ Այս մասին հայտնել է Axios պորտալը՝ հղում կատարելով բանակցությունների ընթացքին ծանոթ երեք աղբյուրների։

Պորտալի տվյալներով՝ ապրիլի 12-ին կայացած բանակցությունների առաջին փուլի ընթացքում Արաղչին ամերիկյան կողմին է ներկայացրել Թեհրանի առաջին գրավոր առաջարկը։ Սակայն Ուիթքոֆը մերժել է այն՝ պատճառաբանելով, որ կոնկրետ նախագծի լուծման ժամանակը դեռ չի եկել։ Ապրիլի 26-ին կայացած բանակցությունների երրորդ փուլի ժամանակ իրանական կողմը կրկին գրավոր առաջարկ է ներկայացրել ԱՄՆ պատվիրակությանը, այս անգամ Ուիթքոֆն ընդունել է այն, որից հետո ամերիկյան կողմը փաստաթղթին ուղարկել է հարցերի ու պարզաբանումների ցանկ։ Ի պատասխան՝ Իրանի պատվիրակությունը ներկայացրել է հարցերի սեփական ցանկը։

Այժմ, ինչպես նշել է պորտալը, ԱՄՆ առաջին պաշտոնական գրավոր առաջարկն ընդունվել է Արաղչիի կողմից եւ ուղարկվել Թեհրան՝ իսլամական հանրապետության գերագույն առաջնորդ, այաթոլա Ալի Խամենեիի եւ երկրի նախագահ Մասուդ Փեզեշքիանի քննարկման համար։ Ամերիկյան փաստաթուղթը ուրվագծում է Իրանի քաղաքացիական միջուկային ծրագրի ապագայի Վաշինգտոնի տեսլականը, դրա նախընտրելի պարամետրերը եւ իրականացման մոնիթորինգի եւ վերահսկողության պահանջները:

Ավելի վաղ ԱՄՆ նախագահ Դոնալդ Թրամփը հայտնել էր, որ Վաշինգտոնը եւ Թեհրանը մոտ են Իրանի միջուկային ծրագրի շուրջ ճգնաժամի կարգավորման վերաբերյալ համաձայնագրի կնքմանը։