Նախընտրելի
Երևանի սիրտը սկսում է բաբախել նոր ռիթմով. սկսվել են քաղաքի մշակութային ժառանգությունն ու իտալական ճարտարապետական նորարարությունները համատեղող հավակնոտ նախագծի շինարարական աշխատանքները։ 100 միլիոն եվրո արժողությամբ նոր ներդրումային ծրագիրը՝ իտալական RENCO ընկերության խմբի մեջ մտնող «Նուովո Վելոդրոմո» ընկերության կողմից, ներառում է մայրաքաղաքի ամենասիրված կանաչ անկյուններից մեկի՝ Անգլիական այգու, վերակառուցումը, ինչպես նաև «Միլանո-Ֆիրենցե» բնակելի և հասարակական աշտարակների կառուցումը, որոնք կդառնան քաղաքային միջավայրի որակի նոր չափանիշ:
Այս նախագիծն ուղղակի ճարտարապետական մտահղացում չէ։ Սա երևանյան ոգու և եվրոպական գեղագիտության սինթեզ է, ձգտում՝ ստեղծելու մի տարածք, որտեղ հարմարավետությունը, ներդաշնակությունը և արդիականությունը կդառնան առօրյա կյանքի մաս։ «Միլանո-Ֆիրենցե» աշտարակները կդառնան նոր կենսակերպի խորհրդանիշ՝ լուսավոր, դինամիկ և ապագային միտված։ Hilton DoubleTree հյուրանոցում տեղի ունեցավ հանդիսավոր միջոցառում՝ նշելու այս վառ և մասշտաբային քաղաքային նախագծի մեկնարկը (ֆոտոռեպորտաժ)։
Անգլիական այգի. նոր շունչ, նոր մեծություն
Երևանի Անգլիական այգու վերակառուցման ծրագիրը RENCO ընկերության նոր քաղաքաշինական նախաձեռնության կարևոր մեկնարկային կետն է: Հենց այս ծրագրի ներկայացումով մեկնարկեց միջոցառումը, որին ներկա էին բիզնեսի ներկայացուցիչներ, ճարտարապետներ, լրագրողներ և պաշտոնյաներ:
RENCO ընկերության նախագահ Ջովաննի Գասպարինին ընդգծեց պահի կարևորությունը. «Մեզ համար մեծ պատիվ է այսօր այստեղ լինել և ներկայացնել Անգլիական այգու վերանորոգման ծրագիրը, ինչպես նաև հայտարարել «Միլանո-Ֆիրենցե» աշտարակների կառուցման աշխատանքների մեկնարկի մասին: Անգլիական այգին կարևոր վայր է ոչ միայն Երևանի, այլև մեր ընկերության՝ RENCO-ի համար»:
Գասպարինիի խոսքով՝ ընկերությունն արդեն վաղուց ներկայություն ունի այս տարածքում. նրա ծրագրերը ձևավորել են այգու հարակից թաղամասի տեսքը:
«Բազմաթիվ մեր ծրագրեր այս տարիների ընթացքում կենտրոնացած են եղել Անգլիական այգու շուրջ: Հետևաբար, մենք հատկապես ուրախ ենք, որ վերջապես կարող ենք վերադարձնել այգուն իր նախկին մեծությունը: Մենք արդեն սկսել ենք լիակատար վերակառուցում: Սա կլինի հիանալի կանաչ տարածք՝ բաց բոլորի համար՝ ընտանիքների, մեծահասակների, Երևանի բոլոր բնակիչների համար»,- նշեց նա:
Այգու վերակառուցմանը ընկերությունը մոտեցել է առանձնահատուկ պատասխանատվությամբ: Ինչպես պատմեց RENCO-ի գլխավոր գործադիր տնօրեն Ջովաննի Ռուբինին, այգուն նոր կյանք հաղորդելու գաղափարը ծնվել է ընկերության լայնամասշտաբ քաղաքաշինական ծրագրի մեկնարկի հետ միաժամանակ.
«Երբ ես և մեր գործընկեր Վահրամ Ադամյանը որոշեցինք նոր թափ հաղորդել մեր ընկերության քաղաքաշինական ծրագրերին, մտածեցինք, որ արժե նաև վերակառուցել և թարմացնել Անգլիական այգին: Մենք ներկայացրեցինք այգու փոքր թարմացման մեր ծրագիրը Երևանի քաղաքապետին, սակայն նա մեզ համոզեց, և համեստ բարելավումների փոխարեն մենք սկսեցինք ավելի լայնամասշտաբ վերակառուցում: Մենք մեծ ուրախությամբ ստանձնեցինք այդ պատասխանատվությունը, քանի որ գիտենք, որ Անգլիական այգին մեծ նշանակություն ունի քաղաքի համար»:
Այգին, որն այս տարի նշում է իր 175-ամյակը, հիմնադրվել է 1850-ականներին և մնում է քիչ թվով կանաչ տարածքներից մեկը, որը գրեթե չի ենթարկվել լուրջ փոփոխությունների: Ջովաննի Ռուբինին հիշեցրեց.
«Այսօր մենք կրկին հանդիպեցինք քաղաքապետի հետ, և նա հաստատեց, որ Անգլիական այգին Հայաստանի այն սակավաթիվ այգիներից է, որը մնացել է անձեռնմխելի: Բացի աննշան փոփոխություններից, այստեղ լուրջ միջամտություններ չեն եղել: Այս այգին մեծ նշանակություն ունի բոլոր քաղաքացիների համար, քանի որ բոլորը գիտեն և մանկուց հիշում են այն»:
Նա նաև ընդգծեց տարածքի պատմամշակութային արժեքը. «Այգին շատ կարևոր է նաև մշակութային նշանակության տեսանկյունից: Այստեղ է գտնվում քաղաքի գլխավոր թատրոնը՝ Սունդուկյանի անվան թատրոնը: Բացի այդ, հենց այս այգում է տեղի ունեցել Հայաստանի պատմության մեջ առաջին պաշտոնական ֆուտբոլային խաղը՝ Երևանի և Գյումրու թիմերի միջև, և այդ խաղում հաղթել է Երևանի թիմը»:
Ներկայացման ժամանակ հատուկ ուշադրության արժանացավ նաև ընկերության մշակութային նախաձեռնությունը. «Մենք խնդրեցինք մեր մեծ բարեկամ Վարդան Կարապետյանին պատրաստել գիրք այս այգու մասին: Այսօր դուք հնարավորություն կունենաք ծանոթանալու գրքից վերցված մի փոքր տեղեկագրին, իսկ գիրքը, կհրատարակվի մինչև տարեվերջ»:
«Միլանո-Ֆիրենցե». հանդիպումների ճարտարապետություն և Արարատ
Անգլիական այգու վերափոխումը RENCO-ի մեծ ծրագրի միայն մեկնարկային մասն է: Ինչպես նշեց RENCO-ի նախագահ Ջովաննի Գասպարինին, սա ոչ թե պարզապես կանաչ տարածքի թարմացում է, այլ Երևանի զարգացման կարևոր քայլ:
«Բացի այդ, մենք սկսել ենք Միլանո-Ֆիրենցե աշտարակների շինարարությունը։ Կստեղծվի մեծ հանրային հրապարակ, որը բաց կլինի քաղաքի բնակիչների համար»։
Մայրաքաղաքի կենտրոնում` Գրիգոր Լուսավորիչ 4/1 հասցեում 3 տարի հետո կտեսնենք այս 2 շենքերը։ 24 հարկից բաղկացած գեղեցիկ բազմաֆունկցիոնալ համալիրում կլինի` 152 բնակարան, 10000 քառակուսի մետր գրասենյակային տարածք, 4000 քառակուսի մետր կոմերցիոն տարածք և 373 ավտոկայանատեղի։ Միլանո Ֆիրենցե թաուերսում արդեն հնարավոր է բնակարան ձեռք բերել, պարզապես անհրաժեշտ է այցելել կայք MilanoFirenze.am կամ զանգահարել նշված հեռախոսահամարով 8025։
Նոր բնակելի համալիրի տեղը պատահականորեն չի ընտրվել. այն քաղաքի ամենահեղինակավոր թաղամասերից մեկն է՝ դեսպանատների թաղամասի մոտ, Հանրապետության հրապարակից ընդամենը մի քանի հարյուր մետր հեռավորության վրա։ Ծրագիրը ներառում է բնակելի ու առևտրային տարածքներ՝ Արարատ լեռան և Երևանի կենտրոնի հիանալի տեսարաններով:
«RENCO-ն, ինչպես միշտ, ձգտում է լինել որակի երաշխավոր։ Մենք ցանկանում ենք Հայաստան բերել իտալական դիզայն, իտալական նյութեր և, ընդհանուր առմամբ, իտալական որակ», - հավելեց Գասպարինին։
Հատուկ ուշադրություն է դարձվում ճարտարապետությանն ու քաղաքի հետ ներդաշնակությանը: Թեև օգտագործվում է իտալական մոդեռն ոճը, նախագիծը կհարմարեցվի Երևանի առանձնահատկություններին՝ կարևորելով կայունությունն ու էկոլոգիան:
Ծրագրի մանրամասները ներկայացրեց RENCO-ի գլխավոր գործադիր տնօրեն Ջովաննի Ռուբինին: Նա ընդգծեց, որ նախկին հեծանվահրապարակի տարածքի կառուցապատումը պարզապես երկու շենքի կառուցում չէ, այլ ամբողջական քաղաքային միջավայրի ստեղծում. «Սա պարզապես շենքեր չեն, որտեղ կլինեն գրասենյակներ ու բնակարաններ: Մենք ցանկանում ենք ստեղծել հանդիպումների միջավայր, որտեղ մարդիկ կշփվեն, և որտեղ կտիրի ջերմ, հաճելի մթնոլորտ»:
Նախագիծը մշակվել է՝ հաշվի առնելով ժամանակակից էկոլոգիական չափանիշները. «Սա կանաչ ծրագիր է: Մենք նախագծել ենք շենքեր, որոնք գրեթե զրոյական արտանետումներ կունենան և էներգիայի նվազագույն ծախս: Սրանք ոչ միայն գեղեցիկ շենքեր կլինեն, այլև բարձրորակ կառույցներ՝ նրբաճաշակ ներքին հարդարանքով»:
Միջոցառման շրջանակում ներկայացված էր նաև բնակարանի անհատական ներքին հարդարարման համար անհրաժեշտ իտալական բարձրորակ պարագաները, որոնք օգտագործվելու են, գնորդին մնում է ընտրել։
Ավելի քան քառորդ դար Հայաստանում. Երևան հյուրանոցից մինչև էներգետիկ ոլորտ
Ջովաննի Ռուբինին ընդգծեց, որ այս նախագիծն արտացոլում է Հայաստանում ընկերության երկարաժամկետ պարտավորությունները. «Մենք Հայաստանում ենք արդեն գրեթե 30 տարի: Այս ընթացքում մենք մեծ գործ ենք արել և ցանկանում ենք շարունակել մնալ այս երկրում: Մենք հավատում ենք Հայաստանին և ցանկանում ենք նրան լավագույնը»:
RENCO-ի նախագահ Ջովաննի Գասպարինին հիշեցրեց ընկերության երկարամյա ներկայության մասին Հայաստանում. «Ցանկանում եմ նաև նշել, որ RENCO-ն վաղուց է գործում Հայաստանում: Ամեն ինչ սկսվեց իմ հորից, որը վերականգնեց Երևան հյուրանոցը՝ մեր առաջին ծրագիրն այստեղ»,- նշեց նա:
Այդ ժամանակվանից ընկերությունը հետևողականորեն ընդլայնել է իր գործունեությունը: Նրա կարևոր ծրագրերի թվում են Congress հյուրանոցը, Իտալիայի դեսպանատան շենքի վերանորոգումը, Piazza Grande-ն և այլն:
Վերջին տարիներին ընկերությունը նաև ակտիվորեն դիվերսիֆիկացրել է իր ներդրումները. «Մենք մուտք գործեցինք էներգետիկ ոլորտ. այսօր մենք ունենք երկրի կարևորագույն էլեկտրակայաններից մեկը»,- ընդգծեց Գասպարինին՝ վստահեցնելով, որ ընկերությունը մտադիր է շարունակել իր գործունեությունը Հայաստանում և զարգացնել ծրագրեր՝ ի բարօրություն երկրի:
