Ադրբեջանում երիտասարդին 18 տարվա ազատազրկման են դատապարտել հայ պատմաբանի հետ շփվելու համար։

Ըստ ԶԼՄ-ների հաղորդագրության, ավարտվել է պետական դավաճանության և հայկական հատուկ ծառայությունների հետ համագործակցության մեջ մեղադրվող Իգբալ Աբիլովի գործով դատական քննությունը։ Լենքորանի ծանր հանցագործությունների դատարանում դատավոր Համեդ Նուրիևի նախագահությամբ կայացած եզրափակիչ նիստում ընթերցվել է դատավճիռը, որի համաձայն ամբաստանյալը դատապարտվել է 18 տարվա ազատազրկման։

Ի. Աբիլովը ձերբակալվել էր Պետական անվտանգության ծառայության (ՊԱԾ) աշխատակիցների կողմից անցյալ տարվա հուլիսին։ Համաձայն նախնական տվյալների, բնակվելով երրորդ երկրի տարածքում՝ նա «կատարել է հայկական հատուկ ծառայությունների ներկայացուցիչների հանձնարարականները և մասնակցել է Ադրբեջանում ազգամիջյան թշնամանքի հրահրմանն ուղղված գործունեությանը»։

«Հատուկ ծառայությունների» դերում հանդես է եկել հայ պատմաբանը։ Խափանման միջոց ընտրելու դատական նիստում հրապարակվել են Ի. Աբիլովի գաղտնի բանակցությունները Skype-ով Երևանի պետական համալսարանի իրանագիտության ամբիոնի վարիչ և Հայաստանի արևելագիտության ինստիտուտի տնօրեն Գառնիկ Ասատրյանի հետ։