Խաղաղության պայմանագրի շուրջ Ադրբեջանի հետ բանակցությունները շարունակվում են։ Այս մասին մայիսի 20-ին Ազգային ժողովում լրագրողների հետ զրույցում հայտարարել է Պետաիրավական հարցերի մշտական խորհրդարանական հանձնաժողովի նախագահ, իշխող «Քաղաքացիական պայմանագիր» կուսակցությունից պատգամավոր Վլադիմիր Վարդանյանը՝ մեկնաբանելով Հայաստանի Սահմանադրությունում փոփոխություններ կատարելու Բաքվի պահանջը։

«Պայմանագրի տեքստը համաձայնեցված է, և դուք այդ մասին գիտեք։ Այնպես որ, տվյալ հարցի վերաբերյալ որևէ լրացուցիչ մեկնաբանություն մենք տալ չենք ուզում»,- ասել է Վարդանյանը։

Ընդ որում, քիչ անց նա հավելել է, որ բանակցային գործընթացն ավարտված է, իսկ տեքստը՝ համաձայնեցված։ «Հայաստանի Հանրապետությունը հայտնել է իր պաշտոնական դիրքորոշումը, համաձայն որի՝ պատրաստ է ստորագրել խաղաղության պայմանագիրը։ Այժմ քննարկվում է միայն ստորագրման վայրն ու ժամանակը։ Այսքանը։ Նոր բան չկա։ Սա է մեր մոտեցումն ու պաշտոնական դիրքորոշումը»,- ամփոփել է պատգամավորը։