ԱՊՀ անդամ երկրների, այդ թվում՝ Հայաստանի, իրավապահ մարմինների աշխատակիցները կկարողանան բարձրացնել փոխադարձ համագործակցության արդյունավետությունը։ Այս մասին մայիսի 20-ին խորհրդարանի Պաշտպանության և անվտանգության մշտական հանձնաժողովի նիստում «Անկախ պետությունների համագործակցության անդամ պետությունների՝ 2010 թվականի դեկտեմբերի 10-ի «Անձանց միջպետական հետախուզման մասին» պայմանագրում փոփոխություններ կատարելու մասին» արձանագրության վավերացման հարցի քննարկման ժամանակ հայտարարել է հանրապետության ներքին գործերի փոխնախարար Արմեն Ղազարյանը։

Արձանագրության ստորագրմամբ նախատեսվում է կատարելագործել ԱՊՀ անդամ պետությունների իրավասու մարմինների միջև անդրազգային հանցավորության դեմ պայքարի ոլորտում, ինչպես նաև անվտանգության և իրավակարգի ոլորտում գործող ԱՊՀ ճյուղային մարմինների միջև տեղեկատվության փոխանակման գոյություն ունեցող մեխանիզմները։

«Սա թույլ կտա բարձրացնել քրեական հետախուզման մեջ գտնվող անձանց հայտնաբերման և ձերբակալման ուղղությամբ համատեղ ջանքերի օպերատիվությունն ու արդյունավետությունը», - նշել է Ղազարյանը։

Ըստ նրա, առաջարկվող փոփոխությունները թույլ կտան նաև ԱՊՀ անդամ երկրների իրավապահ մարմիններին տեղեկատվական համագործակցության շրջանակում օգտագործել այս կամ այն փաստաթղթերի էլեկտրոնային պատճենները։

Որոշ քննարկումներից հետո տվյալ օրենսդրական նախաձեռնությունը ստացել է խորհրդարանական մշտական հանձնաժողովի դրական եզրակացությունը։