Հայաստանի և Ռուսաստանի պարտավորությունները, իրավունքները և մտադրությունները հստակ ամրագրված, ստորագրված ու վավերացված են, և դրանք ոչ ոք չի չեղարկել։ Այս մասին ՀՀ ԱԳ նախարար Արարատ Միրզոյանը հայտարարել է ՌԴ ԱԳ նախարար Սերգեյ Լավրովի հետ համատեղ մամուլի ասուլիսին՝ պատասխանելով այն հարցին, թե արդյո՞ք ՀՀ-ից սպասելի է Եվրոպայում նոր ռազմավարական գործընկերների որոնում։

«Արդյո՞ք պատրաստվում ենք վերաձևաչափել ՌԴ-ի հետ դաշնակցային հարաբերությունները՝ ուղիղ ասում եմ՝ ոչ։ Մեր պարտավորությունները, իրավունքները և մտադրությունները հստակ ամրագրված, ստորագրված ու վավերացված են, և դրանք ոչ ոք չի չեղարկել»,- հայտարարել է Միրզոյանը։

Միևնույն ժամանակ նախարարը նշել է հայկական կողմի մտահոգությունը, որ նախատեսված միջոցառումներն ու մեխանիզմները ոչ միշտ և ոչ լիարժեք են գործել։ Բայց դա այլ հարց է, կարելի է քննարկել մեխանիզմների արդյունավետությունը, բայց դրանց չեղարկման մասին խոսք չկա,- պարզաբանել է ԱԳ նախարարը։

«Ինչ վերաբերում է ՀԱՊԿ-ին, ապա ՀՀ գնահատականը գաղտնիք չէ։ Մենք գոհ չենք կոնկրետ իրադարձությունների վերաբերյալ արձագանքից և սառեցրել ենք կազմակերպությունում գործունեությունը։ Հեռուն գնացող հետևություններ չեմ անի, բայց կհամաձայնեմ պարոն Լավրովի հետ այն հարցում, որ քննարկումները կառուցողական են»,- նշել է Միրզոյանը։