Չիկագոյի բնակչին՝ Վաշինգտոնում Իսրայելի դեսպանատան երկու աշխատակցի սպանության միակ կասկածյալին, սպանության մեղադրանք է առաջադրվել, հաղորդում է Reuters-ը։

31-ամյա Էլիաս Ռոդրիգեսը մեղադրվում է չորեքշաբթի երեկոյան մի խումբ մարդկանց ուղղությամբ կրակ բացելու մեջ, որոնք լքում էին Ամերիկյան հրեական կոմիտեի՝ երիտասարդ մասնագետների և դիվանագետների համար կազմակերպված միջոցառումը։ Այդ կոմիտեն իրավապաշտպան կազմակերպություն է, որը պայքարում է հակասեմականության դեմ և աջակցում է Իսրայելին։

Ըստ մեղադրական փաստաթղթերի, Ռոդրիգեսը դեպքի վայրում ոստիկանությանը հայտարարել է. «Ես դա արեցի հանուն Պաղեստինի, ես դա արեցի հանուն Գազայի»։

Հրազենային վնասվածքից զոհված երկու անձինք ճանաչվել են որպես 30-ամյա Յարոն Լիշչինսկի և 26-ամյա Սառա Լին Միլգրիմ՝ երիտասարդ զույգ, որը պատրաստվում էր ամուսնանալ։

ԱՄՆ գլխավոր դատախազ Փեմ Բոնդին հայտարարել է, որ կասկածյալը, ենթադրաբար, միայնակ է գործել։