ՌԴ նախագահ Վլադիմիր Պուտինն ու Թուրքիայի արտգործնախարարը քննարկել են Ուկրաինայում պատերազմին վերջ տալու ջանքերը եւ այն իրադարձությունները, որոնք տեղի են ունեցել պատերազմող կողմերի միջեւ Մոսկվայում կայացած հանդիպման ժամանակ, հայտնել է Reuters-ը՝ հղում կատարելով Թուրքիայի ԱԳՆ աղբյուրին։

Թուրքիայի արտաքին գործերի նախարար Հաքան Ֆիդանը երկօրյա այցով գտնվում է Մոսկվայում, որտեղ երկուշաբթի հանդիպել է Պուտինի, ինչպես նաեւ Ռուսաստանի գլխավոր բանակցող Վլադիմիր Մեդինսկու հետ, հայտնել է աղբյուրը։

Երեքշաբթի Ֆիդանը հանդիպելու է իր ռուս գործընկեր Սերգեյ Լավրովի հետ։

Իրենց հանդիպման ժամանակ Պուտինն ու Ֆիդանը քննարկել են «Ուկրաինայի եւ Ռուսաստանի միջեւ պատերազմին վերջ տալու վերջին շրջանում ձեռնարկված նախաձեռնությունները, (եւ) իրադարձությունները, որոնք հաջորդել են Ստամբուլում կայացած բանակցություններին»,- տեղեկացրել է թուրքական աղբյուրը։

Քննարկվել են նաեւ երկկողմ տնտեսական եւ էներգետիկ հարցեր, ավելացրել է գործակալության աղբյուրը։

Ակնկալվում է, որ Ֆիդանը այս շաբաթվա վերջին կայցելի Կիեւ՝ հանդիպելու ուկրաինացի պաշտոնյաների հետ եւ շարունակելու բանակցությունները Ստամբուլում: Ռուսական աղբյուրները հայտնել են, որ դիտարկում են Թուրքիան, Արաբական Միացյալ Էմիրությունները, Սաուդյան Արաբիան, Կատարը եւ Օմանը որպես բանակցությունների հնարավոր վայրեր:

Մոսկվայի եւ Կիեւի պատվիրակներն այս ամսվա սկզբին առաջին անգամ հանդիպել են Ստամբուլում 2022թ. մարտից ի վեր։

Հրադադարի շուրջ պայմանավորվածություն ձեռք չի բերվել, սակայն կողմերը պայմանավորվել են փոխանակել 1 000 ռազմագերիների եւ գրավոր ձեւակերպել հնարավոր զինադադարի իրենց պայմանները։