Չինաստանը տիեզերք է արձակել «Տյանչժոու-9» բեռնատար տիեզերանավը, որը սնունդ, սարքավորումներ և այլ անհրաժեշտ պարագաներ կհասցնի չինական ուղեծրային կայանում գտնվող տիեզերագնացներին: Հեռարձակումը տրամադրել է Չինաստանի կենտրոնական հեռուստատեսությունը:

Արձակումը տեղի է ունեցել Պեկինի ժամանակով 05:34-ին՝ CZ-7 հրթիռի միջոցով և Վենչանգի տիեզերակայանից, որը գտնվում է հարավչինական Հայնան նահանգի արևելյան ափին։

Ինչպես նշել է Սիչանի տիեզերական արձակումների կենտրոնի (կառույցը գտնվում է Սիչուան հարավարևմտյան նահանգում և վերահսկում է Հայնանի աստղային նավահանգստի գործունեությունը) ներկայացուցիչ Գո Չժունլայը, արձակումը անցել է բավականին հաջող։ «Tianzhou-9-ը ճշգրիտ կերպով դուրս է եկել նախատեսված ուղեծիր, արևային առագաստը բացվել է և տիեզերանավը գործում է բնականոն աշխատանքային ռեժիմով»,- հայտարարել է նա։

Կայանում գտնվում են «Շենչժոու-20» առաքելության երեք տայկոնավտներ՝ Չեն Դունը (անձնակազմի հրամանատար), Չեն Չժունժույը և Վան Ցզեյը։ Նրանք ուղեծիր են հասել ապրիլի 25-ին։ Բեռի քաշը, որը «Տյանչժոու-9»-ը որոշ ժամանակ անց  հասցրել է կայան՝ կազմում է մոտ 6,5 տոննա։ Իրերի մեջ կան նոր տիեզերազգեստներ և մկանների մարզման համար նախատեսված մարզասարքերի հավաքածու, գիտական փորձերի համար նախատեսված իրեր, այդ թվում՝ տիեզերական բժշկության ոլորտում։

CZ-7-ը նոր տիպի երկաստիճան հրթիռ է և աշխատում է հեղուկ վառելիքով։ Այն ունի 4.2 մետր տրամագծով գլխամասային հատված, հասնում է 53 մետր երկարության և կարող է մոտ 14 տոննա բեռ հասցնել Երկրի մոտակա ցածր ուղեծիր (իսկ գեոստացիոնար ուղեծիր՝ 5.5 տոննա)։ Սա նրա 20-րդ առաքելությունն է, իսկ 2025 թվականին՝ երրորդը։

Չինական կայանը գտնվում է մոտ 400 կմ բարձրության վրա և կգործի ավելի քան 10 տարի։ Այն նախատեսված է երեք մարդու համար (անձնակազմերի ռոտացիայի դեպքում կարճ ժամանակով՝ մինչև վեց)։ T-տառի տեսքով համալիրի զանգվածը (մոտ ապագայում նախատեսվում է ընդլայնել մինչև խաչաձև ոճի), որն ունի երեք միացման հանգույց և դեպի տիեզերք դուրս գալու դարպաս՝ կազմում է 66 տոննա, իսկ խցիկների ծավալը հասնում է 110 խորանարդ մետրի։ 2022 թվականին ուղեծրային օբյեկտը սկսել է աշխատել բնականոն ռեժիմով և անցել միջազգային նախագծերի իրականացմանը։