Ուկրաինայի զինված ուժերը (ՈւԶՈւ) հարվածել են Աստրախանի մարզի Օլյա ծովային նավահանգստին, որը օգտագործվում է Ռուսաստանին իրանական զենքի մատակարարման համար, հայտարարել են Ուկրաինայի բանակի Գլխավոր շտաբից։ «Համաձայն առկա տեղեկատվության՝ խոցվել է «Օլյա նավահանգիստ 4» նավը, որը բեռնված է Իրանից բերված «Շահեդ» տիպի անօդաչու թռչող սարքերի բաղադրիչներով և զինամթերքով»,- ասվում է ՈւԶՈւ Գլխավոր շտաբի հաղորդագրության մեջ։

Նշվում է, որ հարվածը հասցվել է օգոստոսի 14-ին Ուկրաինայի զինված ուժերի հատուկ գործողությունների ուժերի կողմից, որոնք համագործակցում էին այլ ստորաբաժանումների հետ։ «Պաշտպանության ուժերը շարունակում են միջոցներ ձեռնարկել՝ ուկրաինացի օկուպանտների ռազմական ներուժը խաթարելու և Ռուսաստանին Ուկրաինայի դեմ զինված ագրեսիան դադարեցնելու համար»,- եզրափակել են Ուկրաինայի Գլխավոր շտաբից։ Ռուսական իշխանությունները և ՌԴ Պաշտպանության նախարարությունը չեն հաղորդել Աստրախանի մարզի վրա հարվածների մասին։ Ռուսական ռազմական գերատեսչության օգոստոսի 15-ի առավոտյան ամփոփագրում միայն նշվում էր, որ հարակից Կալմիկիայի տարածքի վրա խոցվել է անօդաչու։ Նավահանգստի վրա ՈւԶՈւ հարվածի անկախ հաստատումներ նույնպես չկան։

Օլյա ծովային նավահանգիստը գտնվում է Աստրախանի մարզի Լիմանի շրջանի համանուն գյուղում։ Այն տեղակայված է Վոլգա գետի դելտայում, Բախտեմիր գետի աջ ափին։ Նավահանգիստն ունի վեց կառանատեղ, իսկ նրա բեռնային տերմինալների թողունակությունը կազմում է տարեկան 1580 հազար տոննա։