Վաշինգտոնյան գագաթնաժողովից հետո Հայաստանի արտաքին գործերի նախարար Արարատ Միրզոյանը հեռախոսազրույցներ է ունեցել Իրանի, Վրաստանի, Ֆրանսիայի, Ռուսաստանի, Ղազախստանի իր գործընկերների, ինչպես նաև ԵՄ արտաքին գործերի և անվտանգության քաղաքականության հարցերով բարձր ներկայացուցչի հետ՝ քննարկելու Հայաստանի, Ադրբեջանի և Դոնալդ Թրամփի ստորագրած եռակողմ հռչակագրում արտացոլված պայմանավորվածությունները։ Այս մասին ասվում է ՀՀ ԱԳՆ մամուլի քարտուղար Անի Բադալյանի հաղորդագրության մեջ։

«Նախարարը շնորհակալություն է հայտնել պատմական փուլին, այդ թվում՝ Խաղաղության պայմանագրի նախնական համաձայնեցմանն աջակցելու, ինչպես նաև դրա իրականացմանն օժանդակելու համար։

Տեղի է ունեցել նաև հեռախոսազրույց Հայաստանի և Ադրբեջանի արտգործնախարարների միջև, որի ընթացքում քննարկվել են հռչակագրի իրականացման հարցեր և վստահության ամրապնդման միջոցառումներ»,- նշել է Անի Բադալյանը։