նախընտրելի դարձնելԲոլորն ունեն իրենց մեղքի բաժինը այն բանում, որ երկրի ղեկին այն իշխանություններն են, ովքեր կարող էին ինչ-որ բան անել, բայց չարեցին, նրանք, ովքեր համագործակցեցին այս դավաճանի հետ, նրանք, ովքեր փորձում են ինչ-որ կերպ օգտակար լինել իշխանություններին։ Այս մասին օգոստոսի 20-ին լրագրողների հետ զրույցում հայտարարել է «Հայաստան» դաշինքի պատգամավոր, ՀՅԴ Գերագույն մարմնի ներկայացուցիչ Իշխան Սաղաթելյանը, ով վստահեցրել է, որ չի հրաժարվում իշխանությունների դեմ պայքարից։
Նա կոնկրետ անուններ չի նշել և կոչ է արել լրագրողներինինքնուրույն գտնել այդ հարցի պատասխանը։ Պատգամավորը նշել է, որ «Հայաստան» դաշինքն աշնանային խորհրդարանական նստաշրջանին կմասնակցի իր սեփական օրակարգով։ Դրա հետ մեկտեղ նա նշել է, որ կան օրակարգեր, որոնց շուրջ ընդդիմությունը պետք է ընդհանուր մոտեցում ունենա և համագործակցի և վստահեցրել, որ «Հայաստան» դաշինքը ջանքեր կգործադրի դրա հաջողության համար։
Նրա գնահատմամբ՝ կան տարբեր հիմքեր, այդ թվում՝ իրավական և քաղաքական, որոնց շնորհիվ կարելի է անվստահություն հայտնել վարչապետի նկատմամբ։ ««Հայաստան» դաշինքը հայտարարություններ է արել այս հարցի վերաբերյալ», - նշել է Սաղաթելյանը՝ կոչ անելով գործընթացի մեկնարկի վերաբերյալ մնացած հարցերը ուղարկել չորս անկախ պատգամավորների և իշխող «Քաղաքացիական պայմանագիր» կուսակցության պատգամավորներին։
Պատգամավորը համաձայն չէ այն մտքի հետ, որ ընդդիմությունն արձագանքում է միայն այն բանից հետո, երբ ամեն ինչ արդեն տեղի է ունենում։ «Մենք արդեն չորս տարի է, ինչ խոսում ու խոսում ենք այս սպառնալիքների մասին։ Բացի այդ այս ամենը կանխելու համար եղել են բազմաթիվ փորձեր։ Այո, մենք չենք հասել ցանկալի նպատակին, բայց դա չի նշանակում, որ պետք է հաշտվել դրա հետ և չպայքարել։ Մենք պետք է շարունակենք այնքան, մինչև հասնենք մեր նպատակին։ Իրավիճակը շարունակում է մնալ նույնը, քանի որ իշխանությունները շարունակում են ստել ժողովրդին և մոլորեցնել նրանց, իսկ մեզ չի հաջողվում բացատրել մեր տեսակետը»,- պարզաբանել է նա։
Իշխան Սաղաթելյանը խոստովանել է, որ բազմաթիվ գործոններ կան, որոնք թույլ չեն տվել հասնել նպատակին։ «Բայց դա չի նշանակում, որ մենք չենք պայքարում կամ չպետք գնանք այդ ճանապարհով։ Հնարավո՞ր է դրան հասնել մինչև 2026 թվականը։ Այո, այս ուղղությամբ պետք է ջանքեր գործադրել, ամեն ինչ կորած չէ, անդարձելիության կետը դեռ չի հատվել, եթե մեզ հաջողվի կանխել գործող կառավարության վերընտրվելը», - նշել է նա։
Ընդդիմադիր գործչի խոսքով՝ իշխանությանը փողոցային պայքարի միջոցով պաշտոնանկ անելու հարցը օրակարգից հանված չէ, ճիշտ նախապատրաստման և «տնային աշխատանքի» կատարման դեպքում նման հնարավորություն կլինի և պետք է օգտվել դրանից։
«Եթե դիմադրություն չի եղել, ինչո՞ւ են իշխանությունները կրակում ժողովրդի վրա, կալանավորում մարդկանց և դատում «Սրբազան պայքարի» ներկայացուցիչներին», - հռետորական հարց է տվել պատգամավորը՝ կոչ անելով չկրկնել Փաշինյանի այն թեզերը, որ դիմադրություն չի եղել։ «Դիմադրություն միշտ էլ եղել է, սակայն ոչ այն մասշտաբով, որը մեզ պետք էր», - եզրափակել է նա։
