նախընտրելի դարձնել
Բողոքի ցույցեր են բռնկվել ամերիկյան Microsoft տեխնոլոգիական ընկերության կենտրոնակայանի մոտ՝ Իսրայելի պաշտպանության բանակի (ՑԱԽԱԼ) կողմից պաղեստինցիների զանգվածային հսկողությանը ենթադրյալ մասնակցության պատճառով, ձերբակալվել է 18 մարդ, հաղորդում է Associated Press գործակալությունը։
The Guardian-ը նախկինում հայտնել է, որ Microsoft-ը հետաքննություն է սկսել իր Microsoft Azure ամպային հարթակի միջոցով պաղեստինցիների նկատմամբ Իսրայելի կողմից զանգվածային հսկողության մասին պնդումների վերաբերյալ՝ Guardian-ի հետաքննություններից հետո։
«Չորեքշաբթի օրը Microsoft-ի աշխատակիցների կողմից կազմակերպված բողոքի ցույցերի ժամանակ ոստիկանությունը 18 մարդու է ձերբակալել։ Ընկերությունը խոստացել է «շտապ» հետաքննություն անցկացնել Գազայի հատվածում շարունակվող պատերազմի ընթացքում իսրայելական զինուժի կողմից իր տեխնոլոգիաների կիրառման վերաբերյալ», - գրում է գործակալությունը։
Նշվում է, որ Վաշինգտոն նահանգի Ռեդմոնդ քաղաքում գտնվող Microsoft-ի գլխավոր գրասենյակում արդեն երկու օր է, ինչ բողոքի ցույցեր են ընթանում։ Մասնակիցները կոչ են անում ընկերությանը անհապաղ խզել Իսրայելի բանակի հետ բոլոր գործարար կապերը։
Microsoft-ը հայտարարել է, որ կհրապարակի իր հետաքննության արդյունքները, երբ այն ավարտվի Covington & Burling իրավաբանական ընկերության կողմից։
Ըստ The Guardian-ի նախկինում հրապարակած տեղեկությունների՝ Իսրայելի պաշտպանության բանակը (ՑԱԽԱԼ) սերտորեն համագործակցել է Microsoft-ի հետ Գազայի հատվածում ռազմական գործողություններ իրականացնելիս։ Մասնավորապես, թերթը նշում է, որ Azure ամպային հարթակը լայնորեն օգտագործվել է իսրայելական բանակի կողմից մարտական և հետախուզական գործողություններին աջակցելու համար։ Թերթի պնդմամբ՝ Microsoft-ի կապի համակարգերն օգտագործվել են Իսրայելի ռազմաօդային ուժերի կողմից՝ հարվածներ հասցնելու պոտենցիալ թիրախների տվյալների բազաներին աջակցելու համար։ Ավելի ուշ թերթը հայտնել է, որ Azure հարթակը օգտագործվել է պաղեստինցիների հեռախոսազրույցների ձայնագրությունների լայնածավալ բազան պահելու համար։
