Թերթը գրում է, որ Ազգային վիճակագրական ծառայությունը երեկ հրապարակել է 2011 թվականի նախնական մանրոտնտեսական ցուցանիշները, որոնց համաձայն, տնտեսական ակտիվության ցուցանիշը տարվա կտրվածքով կազմել է 5,9%: «Այլ կերպ ասած տնտեսական աճի ցուցանիշը, ըստ պաշտոնական վիճակագրության, գրեթե 6% է: ՀՀ նախկին վարչապետ Հրանտ Բագրատյանը, սակայն ԱՎԾ-ի ներկայացրած թվերը համարում է պարզապես բլեֆ: Բագրատրյանի խոսքով, օրինակ, ծառայությունների ոլորտի աճ գրանցվել է այն բանի շնորհիվ, որ դրանում ներառվել են նաեւ ԱՊՊԱ-ն, մինչդեռ ԱՊՊԱ-ն իրականում դա ծախս է եւ չի կարող արտադրանք համարվել: Բացի այդ, ըստ նախկին վարչապետի, եթե հանենք նաեւ հանքարդյունաբերության ոլորտը, ապա պարզ կդառնա, որ աճը զրոյական է: «Մյուս բլեֆը` անցած հոկտեմբերին մեզ ասացին, թե տնտեսական ակտիվության ցուցանիշը նախորդ տարվա հոկտեմբերի համեմատ 3% է: Այսօր Վիճվարչության կայքում խմբագրված տարբերակում ունենք 4,1: Նոյեմբերը 2,4 էր, հիմա` 3,1: Ո՞րն է ճիշտը: Անցած տարի հայտարարվեց, թե ՀՆԱ-ի աճը 2,6% է, հետո գրեցին` 2,1%,Համաշխարհային բանկը տվեց 1%: Հիմա սպասենք, թե այս ակտիվության 5,9 տոկոսը 3-4 ամիս հետո ՀԲ կայքում ի՞նչ կդառնա»- գրում է «168 ժամ»-ը: