նախընտրելի դարձնելԴուք մահացած զինծառայողների ծնողների մոտ արել եք անպատասխանատու հայտարարություններ, որի արդյունքը այս գործի նկատմամբ անվստահությունը, այս ճգնաժամն է։ Այս մասին, այսօր՝ հոկտեմբերի 3–ին, Ազատի զինվորական կացարանում 15 զինծառայողի մահվան պատճառ դարձած հրդեհի գործով դատավարության ժամանակ նշեց տուժողների իրավահաջորդների ներկայացուցիչ Նորայր Նորիկյանը՝ դիմելով գործով որպես վկա հարցաքննվող Վահագն Ներսիսյանը, ով որպես սպա–հոգեբան է աշխատում։
«Այս գործի առանցքը հենց Գարուշի դուրս գալու մեջ է։ Շան գլուխը այդպես է թաքնված, որովհետև բոլորի մոտ այդ հարցն է առաջանում, այդ ո՞նց եղավ, Գարուշը դուրս եկավ, մնացած 14 զինծառայողը դուրս չեկավ։ Հիմա դուք մարդկանց ասել եք մի բան, որ այսօր ասում եք դա իմ կարծիքն է եղել։ Ձեր կարծիքը պետք է մնար ձեր տանը կամ ձեր մեջ, առավել ևս, երբ մենք գործ ունենք բարձրագույն կրթություն ունեցող հոգեբանի հետ։
Ես չգիտեմ՝ ձոր ո՞ր խոսքին հավատամ, հիմա ձեր ասած խոսքի՞ն, թե՞ զոհված զինծառայողների ծնողների հետ ունեցած հանդիպման ժամանակ արված խոսքին։ Այն էլ, ծնողների մոտ ձեր ասածը տեղի է ունեցել դեպքից քիչ անց»,–ասաց նա։
Վահագն Ներսիսյանն էլ արձագանքեց. «Որևէ մեկն իմ վրա ճնշում չի գործադրել։ Ես ձեր նշած մարդկանցից որևէ մեկի հետ չեմ հանդիպել, որևէ նախաձեռնություն էլ չի եղել, որ ես իրենց հանդիպեմ։ Ես անձանապես ապրել եմ այդ ողբերգությունը, ուզում եմ իմանալ, ինչի հետ գործ ունենք»։
Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։
Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։
