Նախընտրելի
Հայաստանում առաջին Խոհարարական արվեստի և հյուրընկալության Երեմյան Ակադեմիան ընդունել է Le Cordon Bleu, Swiss School of Management, Business and Hotel Management School հայտնի ուսումնական հաստատությունների ներկայացուցիչներին, որոնք Հայաստանում են գտնվում Միջազգային կրթական էքսպո 2025-ի շրջանակներում։
Ողջունելով հյուրերին՝ Ակադեմիայի տնօրեն Աիդա Տիգրանյանը ներկայացրել է 6 տարիների ընթացքում գրանցած ձեռքբերումներն ու հաջողությունները՝ 2500 շրջանավարտ, շրջանավարտների 90% զբաղվածություն, 60-ից ավելի կրթական ծրագիր, Երևանում և մարզերում հյուրընկալության ոլորտի զարգացում։ Երեմյան ընկերությունների խումբը, լինելով Հայաստանի հյուրընկալության ոլորտի ակունքներում, մշտապես կարևորել է մասնագիտական կրթության դերը։
«Ուրախ ենք, որ մեր շրջանավարտներն ուսումնառությունից հետո շարունակում են իրենց գիտելիքներով հարստացնել հյուրընկալության ոլորտը ոչ միայն Երևանում և մարզերում, այլև Հայաստանի սահմաններից դուրս»,- իր խոսքում նշել է Աիդա Տիգրանյանը՝ կարևորելով նաև Ակադեմիայի միջազգային համագործակցությունների հարուստ փորձն ու ներդրումը խոհարարական դիվանագիտության զարգացման գործում։
Le Cordon Bleu-ի ներկայացուցիչ Մելիսա Կաիսեդո Բետանկուրը, ներկայացնելով հաստատության 130-ամյա գործունեությունը, ընդգծել է, որ արդեն իսկ ունեն մասնաճյուղեր 25 երկրներում և ուսանողներ 100-ից ավելի երկրներից։ Դպրոցը տարիներ շարունակ ստանում է լավագույն խոհարարական դպրոցի վարկանիշավորում։
Swiss School of Management-ի ներկայացուցիչ Սանդրա Սերխիո Սոտտոն կարևորել է միջազգային համագործակցությունների և փորձի փոխանակման ծրագրերի դերը:
Հանդիպման ավարտին հյուրերը շնորհակալություն են հայտնել ջերմ ընդունելության համար՝ ընդգծելով Ակադեմիայի հաջողություններն ու տպավորիչ փորձը խոհարարության, հրուշակագործության, սպասարկման և մենեջմենթի ուղղություններով և նշել, որ Երեմյան Ակադեմիայի հետ կարող են լինել համագործակցության տարբեր եզրեր։
