ՆախընտրելիՈստիկանության քրեական հետախուզության գլխավոր վարչության նախկին պետ, գեներալ-մայոր Հովհաննես Թամամյանի գործով դատական նիստը նշանակվել է փետրվարի 17-ին: Այս մասին NEWS.am-ի թղթակցի հետ զրույցում տեղեկացրեց Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի աշխատակազմի ղեկավար Արմեն Ասլանյանը:
Ավելի վաղ NEWS.am-ը տեղեկացրել էր, որ այդ գործով դատավոր է նշանակվել Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանը:
Հիշեցենք, որ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանը հունվարի 20-ին քննել է ՀՔԾ քննիչի միջնորդությունը` Հովհաննես Թամամյանի կալանքը եւս երկու ամսով երկարաձգելու մասին եւ բավարարել այն: Հովհաննես Թամամյանի կալանքը երկարաձգվում է արդեն 5-րդ անգամ: Դատական նիստը կայացել է առանց Հովհաննես Թամամյանի մասնակցության, քանի որ նա կտրականապես հրաժարվում է մասնակցել նիստերին: Հովհաննես Թամամյանը անազատության մեջ է գտնվում մարտի 24-ից:
Հովհաննես Թամամյանը մեղադրվում է Քրեական օրենսգրքի 308 հոդվածի 2-րդ մասով (Պաշտոնեական լիազորությունները չարաշահելը, որն առաջացրել է ծանր հետեւանքներ): Հայաստանի այն ժամանակվա ոստիկանապետ Ալիկ Սարգսյանը փետրվարի 24-ին Հովհաննես Թամամյանին եւ ոստիկանության Արաբկիրի բաժնի պետ Վարուժան Ադամյանին ազատել էր աշխատանքից գլխավոր դատախազի միջնորդության հիման վրա՝ «հետագա պաշտոնավարման աննպատակահարմարության» հիմնավորմամբ:Մամուլի տեղեկությունների համաձայն, Հովհաննես Թամամյանին կալանավորել են քրեական մի գործի նախաքննությունը շեղելու եւ իրական մեղավորին պատասխանատվությունից ազատելու համար: Նույն գործի շրջանակներում ձերբակալվել էր նաեւ ոստիկանության Արաբկիրի բաժնի պետի օպերգծով նախկին տեղակալ, ոստիկանության փոխգնդապետ Արմեն Պողոսյանը: Թամամյանը ներկայումս գտնվում է «Երեւան-Կենտրոն» ՔԿՀ-ում:
