Մեքսիկայում Իրանի դեսպանատունը վճռականորեն հերքել է ԱՄՆ-ի և Իսրայելի այն հայտարարությունները, թե Մեքսիկայում Իսրայելի դեսպանին սպանելու նպատակով իրականացված դավադրությունը ծրագրվել է Իրանի կողմից, հաղորդում է Mehr-ը։

Մեքսիկայում Իրանի Իսլամական Հանրապետության դեսպանությունը հայտարարություն է տարածել, որում կտրականապես հերքել է Միացյալ Նահանգների և Իսրայելի կողմից Մեքսիկայում Իսրայելի դեսպանի դեմ ենթադրյալ իրանական դավադրության խափանման վերաբերյալ մեղադրանքները։

Իրանի դեսպանատան հրապարակած հայտարարության համաձայն՝ «այն պնդումը, թե Իրանը փորձել է սպանել մեքսիկական ռեժիմի դեսպանին Մեքսիկայում, լրատվամիջոցների կողմից տարածվող մեծ սուտ է, որի նպատակն է վնասել երկու երկրների միջև բարեկամական ու պատմական հարաբերություններին և մենք կտրականապես մերժում ենք դա»։

Դեսպանատունը շեշտել է, որ Իրանի և Մեքսիկայի շահերը համընկնում են՝ հավելելով, որ Մեքսիկայի անվտանգությունը Իրանի անվտանգությունն է։

«Մենք երբեք չենք դավաճանի այն վստահությունը, որը Մեքսիկայի կառավարությունը ցուցաբերել է մեր նկատմամբ», - ասվում է հայտարարության մեջ։

Հայտարարության մեջ նաև նշվում է, որ Իրանը երբեք չի արատավորի մեքսիկական ժողովրդի լավ իմիջը, ցանկացած վնաս Մեքսիկայի շահերին անվանելով «վնաս մեր սեփական շահերին» և հաստատելով, որ մեքսիկական օրենքների նկատմամբ հարգանքը մնում է Իրանի գլխավոր առաջնահերթությունը։

Դեսպանատունը նաև մերժել է Իրանի հասցեին հնչած հակասեմականության մեղադրանքները՝ դրանք անվանելով «մեծ սուտ, որը կեղծվել է իսրայելական ռեժիմի ռասիստ առաջնորդների կողմից»։

Հայտարարության մեջ ընդգծվում էր, որ Իրանում կա ավելի քան 100 սինագոգ և դրանք բոլորը բաց են այցելության համար՝ առանց պահպանության անհրաժեշտության։ Եզրափակելով, հայտարարության մեջ նշվում է, որ հունիսին Իսրայելի կողմից Իրանի վրա հարձակման ժամանակ «երկրի բազմաթիվ հրեական համայնքի նկատմամբ բանավոր վիրավորանքի ոչ մի դեպք չի արձանագրվել»։