Պատերազմը դադարեցնելու ծրագրի, որը մշակել է ԱՄՆ նախագահի բանագնաց Սթիվ Ուիթքոֆը, կետերից մեկում նշվել է Ուկրաինայի անվտանգության երաշխիքների մասին: Սա Կիեւի հիմնական պահանջներից մեկն է, եւ առաջին անգամ ԱՄՆ-ը արտահայտում է նման երաշխիքներ տրամադրելու իր պատրաստակամությունը։

Սակայն ծրագրում ինքնին այդ երաշխիքները որոշակիացված չեն: Այն պարզապես նշում է, որ եթե Մոսկվան կրկին ներխուժի Ուկրաինա, «ուժեղ, համակարգված ռազմական պատասխանից» զատ, կվերականգնվեն նրա դեմ բոլոր պատժամիջոցները։

Սակայն, ինչպես գրել է Axios-ը, ԱՄՆ-ը անվտանգության երաշխիքները հասկանում է որպես ՆԱՏՕ կանոնադրության 5-րդ հոդվածի վրա հիմնված պարտավորություններ: Այս հոդվածը սովորաբար ամփոփվում է որպես դաշինքի անդամներից մեկի վրա հարձակումը բոլորի վրա հարձակում համարելու պարտավորություն։

Սա նշված է մեկ այլ նախագծային փաստաթղթում, որի նախագիծը հրապարակել է Axios-ը եւ որը ստորագրման է առաջարկվում ոչ միայն Մոսկվայի, Կիեւի եւ Վաշինգտոնի, այլեւ ՆԱՏՕ-ի եւ ԵՄ-ի կողմից: Փաստաթղթում նաեւ նշվել է, որ եթե Ռուսաստանը կրկին հարձակվի Ուկրաինայի վրա, ԱՄՆ նախագահը, ՆԱՏՕ-ի եւ ԵՄ-ի հետ խորհրդակցություններից հետո, «կորոշի անվտանգությունը վերականգնելու համար անհրաժեշտ միջոցառումները»։ Փաստաթղթում նշվել է, որ դրանք կարող են ներառել ռազմական ուժ, հետախուզական եւ լոգիստիկ աջակցություն, տնտեսական եւ դիվանագիտական ​​գործողություններ եւ այլ քայլեր։

Ստորագրվելուց հետո անվտանգության մասին համաձայնագիրը ուժի մեջ կմնա 10 տարի՝ երկարաձգման հնարավորությամբ։