Եվրոպական երկրների ղեկավարները մշակում են Ուկրաինայում պատերազմն ավարտելու իրենց սեփական առաջարկները, տեղեկացրել է The Wall Street Journal-ը: Եվրոպացի պաշտոնյաների խոսքով՝ Միացյալ Նահանգները Կիեւին «վատ գործարք» է առաջարկել։

Եվրոպական ծրագիրը ամերիկյան ծրագրի այլընտրանքն է, որը վերջերս մշակվել է Վաշինգտոնի կողմից եւ, ըստ էության, բավարարում է Վլադիմիր Պուտինի բազմիցս ներկայացրած պահանջները: Եվրոպացիները համոզում են Ուկրաինային աջակցել իրենց ծրագրին, որը, ինչպես կանխատեսվում է, ավելի նպաստավոր կլինի նրա համար, սակայն Կիեւը դեռեւս չի համաձայնել միանալ, գրել է WSJ-ն: Եվրոպան հույս ունի մի քանի օրվա ընթացքում պատրաստել խաղաղ պայմանավորվածությունների իր սեփական տարբերակը։

ԵՄ պաշտոնյաներն ու դիվանագետները դժգոհություն են հայտնել Վաշինգտոնի մոտեցման փոփոխության վերաբերյալ, որը, նրանց խոսքով, կրկին այն է, ինչը նրանք անվանում են «վատ գործարք» Ուկրաինայի համար, գրել է Politico-ն: «Իհարկե, սա մտահոգիչ է, բայց մենք պետք է հավատարիմ մնանք մեր դիրքորոշմանը»,- պարբերականին ասել է ԵՄ դիվանագետը: «Եթե Ռուսաստանը խուսափի պատասխանատվությունից, միայն ժամանակի հարց է, թե երբ կտեսնենք նոր ագրեսիա ոչ միայն Ուկրաինայի, այլեւ ԵՄ եւ ՆԱՏՕ անդամ պետությունների դեմ»: Եվրոպացի բարձրաստիճան պաշտոնյայի խոսքով՝ ԱՄՆ առաջարկած ծրագիրը պարզապես «Պուտինին բավարարելու կետերի» ցանկ է, եւ որ դա շատ վատ ծրագիր է։

Գերմանիայի կանցլեր Ֆրիդրիխ Մերցը «ինտենսիվորեն» աշխատում է եվրոպական արձագանքը համակարգելու ուղղությամբ, որը թույլ կտա նրան Ուկրաինային առաջարկել խաղաղության համաձայնագրի ճիշտ պայմաններ, Politico-ին ասել է գերմանացի պաշտոնյան։

Եվրոպացի պաշտոնյաների խոսքով՝ ԱՄՆ-ը չի խորհրդակցել իրենց հետ իր ծրագիրը մշակելիս։ Ուկրաինան նույնպես մեծ մասամբ անտեսվել է։ Չնայած ամերիկացի պաշտոնյաները պնդում են, որ նրանք ուշադիր համակարգում են համաձայնագրի պայմանները Կիեւի հետ, գրել է Wall Street Journal-ը։ Ուկրաինայի ազգային անվտանգության եւ պաշտպանության խորհրդի քարտուղար Ռուստեմ Ումերովը հավանություն է տվել «ծրագրի մեծ մասին» ԱՄՆ պաշտոնյաների հետ բանակցությունների ժամանակ, ասել է Սպիտակ տան մամուլի քարտուղար Քերոլայն Լիվիթը։ Սակայն Ումերովին դրա մասին տեղեկացրել են միայն վերջին օրերին։