նախընտրելի դարձնել
Պատերազմի ավարտի վերաբերյալ ԱՄՆ պատրաստած ծրագրի ամբողջական տեքստի մասին լրատվամիջոցների հաղորդագրությունների ֆոնին եվրոպացի քաղաքական գործիչները մեկնաբանում են փաստաթուղթը, որի մշակմանը նրանք չեն մասնակցել։
Եվրամիության արտաքին գործերի նախարար Կայա Կալասը, տեղեկացրել է Reuters-ը, հայտարարել է, որ ԵՄ-ը կաջակցի ցանկացած ծրագրի, որն Ուկրաինային կբերի երկարատեւ եւ արդար խաղաղություն։
«Ինչ վերաբերում է այն ծրագրին, որը, ինչպես մենք հասկանում ենք, ներկայացվել է նախագահ Զելենսկուն, մենք միշտ ասել ենք, որ որրպեսզի դա աշխատի, Ուկրաինան եւ եվրոպացիները պետք է համաձայնեն դրան»,- ուրբաթ ասել է Կալասը։
Գերմանիայի արտաքին գործերի նախարար Յոհան Վադեֆուլը առաջարկված ամերիկյան ծրագիրը համարում է Մոսկվայի եւ Կիեւի քննարկման ենթակա հարցերի ցանկ, այլ ոչ թե վերջնական փաստաթուղթ, նշել է Reuters-ը։
«Գերմանիայի դիրքորոշումը Եվրոպայի դիրքորոշումն է, եւ դա նշանակում է, որ մենք աջակցում ենք Ուկրաինային։ Մենք ցանկանում ենք ապահովել, որ Ուկրաինան կարողանա բանակցել այս կետերի շուրջ ուժի դիրքերից»,- ասել է Վադեֆուլը։
«Մենք այժմ գնահատում ենք իրավիճակը մեր դաշնակիցների եւ Ուկրաինայի հետ միասին։ Ես քննարկել եմ հարցը վարչապետի եւ արտգործնախարարի հետ եւ կքննարկեմ այն կառավարության հետ»,- գրել է Ֆինլանդիայի նախագահ Ալեքսանդր Սթուբը X սոցցանցում։
Politco-ն, հղում կատարելով աղբյուրներին, տեղեկացրել է, որ Ուկրաինայի արտգործնախարար Անդրեյ Սիբիգան Բրյուսելում ԵՄ իր գործընկերների հետ հանդիպման ժամանակ ասել է, որ Ռուսաստանը հստակորեն թելադրել է առաջարկվող ծրագրի պայմանները։
«Հիմնական եզրակացությունն այն է, որ ոչ մի խաղաղության ծրագիր չի կարող իրականացվել, եթե այն հիմնված է ագրեսորին հանդարտեցնելու վրա»,- պարբերականի աղբյուրի խոսքով՝ ասել է Սիբիգան։ «Սա կարող է հանգեցնել միայն նոր պատերազմի եւ բռնության Ուկրաինայում եւ ամբողջ Եվրոպայում»։
Wall Street Journal-ի տվյալներով՝ եվրոպացի առաջնորդները աշխատում են պատերազմը դադարեցնելու այլընտրանքային ծրագրի վրա, որն ավելի բարենպաստ կլինի Ուկրաինայի համար։ Եվրոպան հույս ունի, որ փաստաթուղթը պատրաստ կլինի առաջիկա օրերին։
CNN-ը, հղում կատարելով Ուկրաինայում բնակվող եվրոպացի դիվանագետին, տեղեկացրել է, որ ծրագիրը անակնկալ է եղել եվրոպացիների համար։ Հեռուստաալիքի աղբյուրի խոսքով՝ Վաշինգտոնում գտնվող եվրոպացի դիվանագիտական գործընկերները նույնպես տեղյակ չեն եղել փաստաթղթի մշակման մասին։ «Մարդիկ, ովքեր պետք է իմանային այս մասին, ոչինչ չգիտեին... Սա նյարդայնություն եւ շփոթություն է առաջացնում»,- CNN-ին ասել է զրուցակիցը։
