1950-ականներին Միացյալ Նահանգները միջուկային տեխնոլոգիաներ էր առաջարկում այն ​​երկրներին, որոնք համաձայնվել էին դրանք օգտագործել խաղաղ նպատակներով. այդպես էլ այժմ Թրամփի վարչակազմը քննարկել է արհեստական ​​բանականության տեխնոլոգիաներ վաճառելու հարցը հակամարտությունները դադարեցնող երկրներին, որոնց թվում՝ Հայաստանին և Ադրբեջանին, The New York Times-ին հայտնել է երկու աղբյուր:

Վերջին 10 ամսվա ընթացքում Թրամփը մտերմացել է Nvidia-ի գործադիր տնօրեն Ջենսեն Հուանգի հետ, քանի որ ընկերության չիպերը գործիք են դարձել առևտրի և խաղաղության բանակցություններում:

Անցյալ ամիս Հարավային Կորեայում անցկացված գագաթնաժողովում Թրամփը հայտարարել է, թե ինքն ավելին է անում, քան ԱՄՆ ցանկացած այլ նախագահ՝ տվյալների կենտրոններ կառուցելու և ամերիկացի աշխատողներ վարձելու համար:

Արհեստական ​​բանականության նախագծերի համար անհրաժեշտ հզոր համակարգչային չիպեր արտադրող Nvidia-ն դարձավ առաջին ամերիկյան տեխնոլոգիական ընկերություններից մեկը, որը կատարեց իր արտադրության մի մասը ԱՄՆ տեղափոխելու՝ Թրամփին տված խոստումները:

Եվ Թրամփը, որն ուշադիր հետևում է ֆոնդային շուկայի դինամիկային, հիանալի գիտակցում է, որ Nvidia-ն դարձել է աշխարհի ամենաարժեքավոր հանրային ընկերությունը: Ընկերության չիպերը նրան նաև հզոր լծակներ են տվել տարբեր երկրների, մասնավորապես՝ Սաուդյան Արաբիայի, Մեծ Բրիտանիայի և Չինաստանի հետ բանակցություններում: Դրանք նաև դեր են խաղացել վարչակազմի՝ մի քանի երկրի միջև խաղաղության միջնորդական ջանքերում։