Սանկտ Պետերբուրգի Նևսկու շրջանի դատարանը 15 հազար ռուբլու տուգանք է նշանակել բլոգեր Արսեն Մարկարյանին՝ թմրամիջոցների քարոզչության հոդվածով, հայտնում է РИА Новости-ն՝ հղում անելով քաղաքի դատարանների միացյալ մամուլի ծառայությանը։

Ինչպես նշվում է, մայիսի 2-ին Մարկարյանը սոցիալական ցանցի իր էջում հրապարակել էր տեսանյութ, որտեղ պատմում էր որոշակի հոգեմետ նյութի հատկությունների մասին՝ որպես ֆիզիկական և մտավոր ակտիվության խթանիչ, ինչպես նաև մշտական էներգիայի աղբյուր։ Տեսանյութում նշվել էին առանձին իրավիճակներ, «որոնցում տվյալ նյութի օգտագործումը ներկայացվում էր որպես միակ ճիշտ ընտրություն»։

Դատարանի մամուլի ծառայության տվյալներով, տեսանյութը դիտել է ավելի քան 113 հազար օգտատեր, իսկ 4 հազարից ավելին հավանություն է տվել։ Արդյունքում Մարկարյանը ենթարկվել է վարչական պատասխանատվության։ «Հետազոտությունը հաստատել է, որ ներկայացված նյութում առկա են հոգեմետ նյութերի քարոզչության լեզվաբանական և հոգեբանական հատկանիշների համակցություն… Դատարանը նշանակել է 15 000 ռուբլու տուգանք», — ասված է հաղորդագրությունում։

Նոյեմբերին Մոսկվայի Տագանկայի դատարանը երկու ամսով երկարացրել էր Մարկարյանի կալանքը, որը մեղադրվում է Հայրենիքի պաշտպանների հիշատակը վիրավորելու մեջ։ Բլոգերը քննչական մեկուսարան էր ուղարկվել օգոստոսի 25-ին։

Ավելի վաղ Մոսկվայի Քննչական կոմիտեի գլխավոր վարչությունում հայտնել էին, որ Մարկարյանին մեղադրանք է առաջադրվել Ռուսաստանի քրեական օրենսգրքի 354.1 հոդվածի 4-րդ մասով (Հայրենիքի պաշտպանների հիշատակի վիրավորանք, կատարված համացանցի միջոցով)։ Վիրավորական տեղեկատվություն պարունակող տեսանյութը նա տեղադրել էր հայտնի վիդեոհոսթինգում ոչ ուշ քան փետրվարի 25-ը, որից հետո հայտարարվել էր նրա հետախուզումը։ Հարցաքննության ընթացքում բլոգերը մեղքը չէր ընդունել։

Սակայն կալանքի վերցվելուց հետո նրա պաշտոնական Telegram-ալիքում հայտնվել էր երկար գրառում, որտեղ նա ներողություն էր խնդրում բոլորից, ում «կարող էր վիրավորել իր տեքստերով կամ տեսանյութերով»։ Նա նաև գրել էր, որ տառապել է երկարատև դեպրեսիայից և մանրամասն ներկայացրել դրա պատճառները։

ՌԴ ՆԳՆ-ում հավելել էին, որ բլոգերը կստուգվի նաև «համացանցում հասարակական անվտանգության և պետական իշխանության դեմ կատարված» այլ հանցագործությունների մեջ հնարավոր ներգրավվածության համար։