Նախընտրելի
Վրաստանի խորհրդարանի փոխխոսնակ Գեորգի Վոլսկին Թուրքմենստանում անցկացվող «Խաղաղություն և վստահություն» համաժողովն անվանել է «այն վայրը, որտեղ որոշվում է երկրի ապագան»։ Նա այս հայտարարությունն արել է՝ բացատրելով վարչապետ Իրակլի Կոբախիձեի ֆորումին մասնակցության և Վլադիմիր Պուտինի հետ համատեղ լուսանկարում հայտնվելու պատճառները։
«Աշգաբադում հանդիպումը հատկապես նշանակալից է։ Բոլորը գիտեն, թե ով է զավթիչը։ Վրաստանը միակ երկիրն է, որը դիվանագիտական հարաբերություններ չունի Ռուսաստանի հետ։ Այստեղ արդարացումներն անտեղի են։ Ահա թե ինչու վարչապետը մեկնեց այտեղ, որտեղ որոշվում և ծրագրվում է Վրաստանի ապագան»,- ասել է Վոլսկին, հաղորդում է «Новости-Грузия»-ն։
Նա ակնարկել է, որ Կոբախիձեի այցի հիմնական պատճառը Ադրբեջանի վարչապետի հետ հանդիպումն էր։ Վերջերս Թբիլիսիի և Բաքվի միջև հարաբերություններում մտահոգիչ նշաններ են ի հայտ եկել. կառավարամետ ադրբեջանական լրատվամիջոցները սկսել են խոսել «Վրաստանի քաղաքական տրամաբանության փոփոխության» մասին և ակնարկել, որ Թբիլիսին, իբր, խոչընդոտում է Բաքվի և Երևանի միջև հարաբերությունների կարգավորմանը։
«Եթե Պուտինը մասնակցում է, դա չի նշանակում, թե վարչապետը չպետք է հանդիպի Ադրբեջանի վարչապետի հետ։ Եթե բողոքներ ունեք Թուրքմենստանի կամ նրա կառավարման ոճի վերաբերյալ, դա չի նշանակում, որ մենք չպետք է գործենք մեր սեփական շահերից ելնելով, երբ տեսնում ենք նման օրինակներ»,- ընդգծել է նա։
Աշգաբադում անցկացված ֆորումը նվիրված էր ՄԱԿ-ի «Խաղաղության և վստահության միջազգային տարվան» և Թուրքմենստանի մշտական չեզոքության 30-ամյակին։ Կոբախիձեի և Պուտինի հետ ներկա էին նաև Հայաստանի, Թուրքիայի, Իրաքի, Ղազախստանի, Ղրղզստանի, Ուզբեկստանի, Տաջիկստանի, Ադրբեջանի և Պակիստանի առաջնորդները։
Կոբախիձեն Աշգաբադ կատարած իր այցը բացատրել է նաև Կենտրոնական Ասիայի երկրների հետ հարաբերությունները ամրապնդելու և հարևան Ադրբեջանի և Հայաստանի հետ կապերը պահպանելու անհրաժեշտությամբ։ Նա ընդդիմության հայտարարությունները, ըստ որոնց ուղևորությունը Թբիլիսիի՝ Արևմուտքից հեռանալու քայլ է և Մոսկվայի աջակցությունը վայելող «Վրաստանի չեզոքության» գաղափարը առաջ մղելու գործիք, «բացարձակապես անլուրջ շահարկումներ» է անվանել:
