նախընտրելի դարձնել
Ավստրալիայի Սիդնեյ քաղաքի Բոնդայ լողափում տեղի ունեցած հարձակման մեջ կասկածվողը դուրս է եկել կոմայից, հաղորդում է ավստրալական 7news հեռուստաալիքը։
Դեկտեմբերի 14-ին ահաբեկիչները կրակ են բացել Սիդնեյի Բոնդայ լողափում գտնվող մարդկանց վրա: Նոր Հարավային Ուելս նահանգի ոստիկանության տվյալներով՝ հարձակվողները եղել են երկու տղամարդ՝ 50 և 24 տարեկան, հայր և որդի: Հրաձգության հետևանքով զոհվել է 16 մարդ, այդ թվում՝ հարձակվողներից մեկը․ վիրավորվել է 40 մարդ: Իսրայելական Kan հեռուստառադիոընկերությունը հայտնել է, որ հրաձգությունը տեղի է ունեցել Խանուկայի մոմերի վառման արարողության ժամանակ, որին հավաքվել էին տեղի հրեական համայնքի ներկայացուցիչները: Ինչպես հայտնել է նահանգի ոստիկանությունը, ահաբեկչության վայրից առգրավվել և սակրավորների կողմից վնասազերծվել է երկու ինքնաշեն պայթուցիկ սարք:
«Կիրակի օրը Բոնդայ լողափում ահաբեկչություն իրականացրած ենթադրյալ հրաձիգը դուրս է եկել կոմայից։ Քսանչորսամյա Նավիդ Ակրամն այժմ գիտակցության է եկել հիվանդանոցում։ Նրա հայրը սպանվել էր ոստիկանության հետ փոխհրաձգության ժամանակ, իսկ Ակրամը ծայրահեղ ծանր վիճակում տեղափոխվել էր հիվանդանոց։ Այժմ քննիչները հնարավորություն կունենան առաջին անգամ հակիրճ հարցաքննել Ակրամին»,- հայտնում է հեռուստաալիքը։
Հեռուստաալիքի տեղեկություններով՝ ահաբեկչության դեմ պայքարի մասին օրենքի համաձայն՝ ոստիկանությունն իրավունք ունի երկարաձգել Ակրամի կալանքը երկար ժամկետով։ Ոստիկանությունը շարունակում է հարձակման դրդապատճառների և հանգամանքների հետաքննությունը։
Ավստրալական ABC հեռուստաալիքը երկուշաբթի օրը հաղորդել է, որ ավելի քան 2000 մարդ, այդ թվում՝ երկրի Լեյբորիստական և Լիբերալ կուսակցությունների քաղաքական գործիչներ, հավաքվել են Քոլֆիլդի սինագոգում, որը Ավստրալիայի Մելբուռն քաղաքի մոտակայքում գտնվող մեծ հրեական թաղամաս է և ունի մեծ համայնք, որպեսզի հարգեն ահաբեկչական հարձակման զոհերի հիշատակը։
Ահաբեկչությունից հետո Ավստրալիայի վարչապետ Էնթոնի Ալբանեզեն հայտարարել է երկրում զենքի մասին օրենքները խստացնելու վերաբերյալ կառավարության պատրաստակամության մասին և նշել է, որ մեկ անձի տիրապետած զենքի քանակը կարող է սահմանափակվել։
