Դեկտեմբերի 18-ին Էստոնիայի արտաքին գործերի նախարարությունը կանչել է Ռուսաստանի գործերի ժամանակավոր հավատարմատարին՝ դեկտեմբերի 17-ին երկու երկրների միջեւ ժամանակավոր վերահսկողության գծի ենթադրյալ անօրինական հատման վերաբերյալ բողոքի նոտա փոխանցելու համար։

Խախտումը տեղի է ունեցել Նարվա գետի վրա՝ Վասկնարվա գյուղի մոտ գտնվող ծովախորշի մոտ, որտեղ ռուս սահմանապահները Էստոնիայի տարածքում գտնվում էին առանց թույլտվության, նշվել է արտաքին գործերի նախարարության կայքում տեղադրված հայտարարության մեջ։

Էստոնիայի արտաքին գործերի նախարար Մարգուս Ցախկնան նշել է, որ տարածքում հսկողությունն ուժեղացվել է, եւ որ Տալլինը պատրաստ է արձագանքել։ «Սահմանները ստուգելու Ռուսաստանի փորձերին լավագույն պատասխանը Ուկրաինային շարունակական աջակցությունն է եւ Ռուսաստանի վրա քաղաքական ու տնտեսական ճնշման ավելացումը»,- ավելացրել է նախարարը։

Էստոնիայի իշխանությունների տվյալներով՝ դեկտեմբերի 17-ին երեք ռուս սահմանապահներ անօրինական կերպով հատել են երկրի սահմանը։ Ըստ տեղեկությունների՝ նրանք եկել են օդով, քայլել ծովախորշի երկայնքով, ապա վերադարձել իրենց մեքենա եւ կրկին հատել սահմանը։ Ըստ լրատվամիջոցների հաղորդագրությունների՝ սահմանապահները Էստոնիայի տարածքում մնացել են մոտ 20 րոպե։ Նախնական ծանուցում այդ մասին չի եղել։

DPA լրատվական գործակալությունը նշել է, որ էստոնական կողմն ունի միջադեպի տեսագրությունը։

Էստոնիայի ներքին գործերի նախարար Իգոր Տարոն հայտնել է, որ ռուս սահմանապահների գործողությունների դրդապատճառները մնում են անհասկանալի։ «Անվտանգության անմիջական սպառնալիք չկար, սակայն ոստիկանությունն ու սահմանապահները զգալիորեն մեծացրել են իրենց ներկայությունն ու պարեկային ծառայությունը»,  հինգշաբթի էստոնական հեռուստատեսությամբ ասել է Տարոն։