նախընտրելի դարձնել
Իր նախընտրական ծրագրի շրջանակում Հայ ազգային կոնգրեսն առաջարկում է դեպի Իրան երկաթուղի կառուցել բացառապես Հայաստանի միջով։ Այս մասին դեկտեմբերի 26-ին լրագրողների հետ հանդիպման ժամանակ հայտնել է Հայ ազգային կոնգրեսի վարչապետի թեկնածու, ՀԱԿ վարչության փոխնախագահ Լեւոն Զուրաբյանը՝ ներկայացնելով համապատասխան նախագիծը։
Նրա խոսքով՝ «Թրամփի երթուղի» (TRIPP– խմբ.) նախագիծն ունի մի շարք թերություններ։ Նախ՝ այն կհանգեցնի աշխարհաքաղաքական բախման, քանի որ բացառում է տարածաշրջանում զգալի աշխարհաքաղաքական շահեր ունեցող երկրներին։ «Ռուսաստանը, Չինաստանը, Հնդկաստանը եւ Իրանը բացառված են այս կարգավորումից։ Եվ սա դանդաղ գործողության ռումբ է դնում տարածաշրջանի աշխարհաքաղաքական իրավիճակի տակ»,- բացատրել է Զուրաբյանը։
Երկրորդ խնդիրը, ինչպես նշել է ընդդիմադիր գործիչը, այն է, որ TRIPP-ի իրականացումը կհանգեցնի նրան, որ հայկական բոլոր հաղորդակցությունները կախված կլինեն Ադրբեջանից։ Հետեւաբար, Հայաստանը կենթարկվի Բաքվի մշտական ճնշմանը։ Եվ Բաքուն կպահանջի քաղաքական զիջումներ, այդ թվում՝ ժողովրդագրական ոլորտում։ Այս առումով ՀԱԿ-ը ներկայացրել է իր սեփական նախագիծը, որը հիմնված է չինական մի ընկերության կողմից դեռեւս 2016թ․ կատարված հաշվարկների վրա: Մասնավորապես, կուսակցությունն առաջարկում է կառուցել երկաթուղի Գագարինից՝ Գավառով, Մարտունիով, Գորայքով, Սիսիանով, Տաթեւով, Մեղրիով եւ Ագարակով մինչեւ Իրանի սահմանը: «Մենք կարծում ենք, որ այս նախագիծը չպետք է ավարտվի Ագարակով: Պետք է կառուցվի ճանապարհ դեպի Թավրիզ կամ Ջուլֆա: Սա կկապի Հայաստանը Իրանի հետ: Ավելին, դա նաեւ կստեղծի բոլորովին նոր իրականություն Հայաստանի համար»,- նշել է Տեր-Պետրոսյանի դաշնակիցը:
Նրա խոսքով՝ երկաթուղին կանցնի Հայաստանի տարածքով: Այն կդառնա միջազգային տրանսպորտային երթուղու մաս, որը կապի Սեւ ծովը Պարսից եւ Հնդկական ծոցերի հետ: Նա ավելացրել է, որ եթե Ինգուշիայի միջով կառուցվի երկաթուղի Վրաստանի եւ Ռուսաստանի միջեւ, այն կապահովի Հայաստանի կապը Ռուսաստանի Դաշնության հետ՝ առանց Թուրքիայի եւ Ադրբեջանի որեւէ ազդեցության:
