Նախընտրելի
Իրանի Իսլամական հեղափոխության պահապանների կորպուսի (ԻՀՊԿ) գլխավոր հրամանատարի ավագ խորհրդական, բրիգադային գեներալ Մորթեզա Ղորբանին հայտարարել է, որ Իրանի զինված ուժերը գտնվում են մարտունակության ամենաբարձր մակարդակի վրա և պատրաստ են վճռականորեն պատասխանել Միացյալ Նահանգների կամ Իսրայելի կողմից ցանկացած ագրեսիայի, հայտնում է Mehr գործակալությունը:
Խոսելով Միացյալ Նահանգների կամ Իսրայելի հնարավոր հարձակմանը պատասխանելու Իրանի պատրաստակամության աստիճանի մասին՝ բրիգադային գեներալ Մորթեզա Ղորբանին նշել է, որ ԻՀՊԿ-ի և բանակի 400 ստորաբաժանումները գտնվում են լիակատար մարտական պատրաստության վիճակում:
«Նրանք պատրաստ են: Եթե տեղի ունենա որևէ ագրեսիա, նրանք այն [Իսրայելը] հողին կհավասարեցնեն», - ասել է Ղորբանին:
Նա հավելել է, որ բանակը, ԻՀՊԿ-ն և իրավապահ մարմինները գտնվում են «լիակատար մարտական պատրաստության վիճակում»՝ ձեռքերը պահելով ձգանի վրա:
«Ես հպարտությամբ հայտարարում եմ, որ բանակը, ԻՀՊԿ-ն և ոստիկանական ուժերը լիովին պատրաստ են», - նշել է նա՝ ընդգծելով, որ զսպման և ուժի այս մակարդակը բխում է նահատակ գեներալ Ղասեմ Սոլեյմանիի ժառանգությունից, անունից և ուղուց: Ավելի վաղ՝ երեքշաբթի օրը, Իրանը զգուշացրել էր, որ երկրի դեմ թշնամական գործողությունների շարունակումը կհանգեցնի կոշտ և համաչափ պատասխանի:
Երեքշաբթի կեսօրին հրապարակված հայտարարության մեջ Իրանի Իսլամական Հանրապետության Ազգային անվտանգության բարձրագույն խորհրդի քարտուղարությունը խստորեն դատապարտել է երկրի դեմ ուղղված սպառնալիքների սրումը և միջամտողական հայտարարությունները: Հայտարարության մեջ ընդգծվում է, որ Իրանի անվտանգությունը, անկախությունը և տարածքային ամբողջականությունն անխախտելի «կարմիր գիծ» են՝ նախազգուշացնելով, որ ագրեսիայի ցանկացած գործողության կամ թշնամական վարքագծի շարունակմանը կտրվի համաչափ, հաստատակամ և վճռական պատասխան:
Քարտուղարությունն այնուհետև նշել է, որ օրինական ինքնապաշտպանության շրջանակներում Իրանի Իսլամական Հանրապետությունը չի սահմանափակվում բացառապես որևէ գործողություն կատարվելուց հետո պատասխան միջոցներ ձեռնարկելով:
Հայտարարության համաձայն՝ սպառնալիքի հստակ և շոշափելի նշանները դիտարկվում են որպես Իրանի անվտանգության հավասարման մաս՝ շեշտելով անվտանգության ապահովման այնպիսի մոտեցում, որը հիմնված է զսպման և պատրաստվածության վրա:
