«Ալֆա» հատուկ գործողությունների կենտրոնը՝ Ուկրաինայի զինված ուժերի ռազմածովային ուժերի ստորաբաժանումների հետ համատեղ, հարված է հասցրել Ռոստովի մարզի Տագանրոգ քաղաքի «Ատլանտ Աերո» գործարանի արտադրական մասնաշենքերին, հայտնել է Ուկրաինայի անվտանգության ծառայությունը (ՈւԱԾ):

Թիրախին հարվածելու հետևանքով օբյեկտում «նկատվել է հզոր պայթյունների շարք և հրդեհ», նշել են ծառայությունում:

Ինչպես հստակեցնում է ՈւԱԾ-ն, «Ատլանտ Աերո»-ն զբաղվում է «Մոլնիյա» տեսակի հարվածային-հետախուզական անօդաչու թռչող սարքերի (ԱԹՍ), ինչպես նաև ռուսական զորքերի կողմից օգտագործվող «Օրիոն» ԱԹՍ-ների բաղադրիչների նախագծման, պատրաստման և փորձարկման ամբողջական փուլով:

«Գործարանի խոցումը կնվազեցնի ԱԹՍ-ների արտադրության ծավալները և կթուլացնի օկուպանտների տեխնիկական հնարավորությունները՝ անօդաչուների կիրառմամբ հետախուզական-հարվածային գործողություններ իրականացնելու հարցում»,- ասված է ՈւԱԾ հաղորդագրության մեջ։

Ավելի վաղ Տագանրոգի ուղղությամբ անօդաչուների հարձակման մասին հայտնել էին քաղաքային իշխանությունները։ Ընդ որում, Ռոստովի մարզի նահանգապետ Յուրի Սլյուսարը նշել էր, որ ոչ ոք չի տուժել, սակայն ավերածություններ է կրել անանուն «արդյունաբերական օբյեկտը»։

Քաղաքի ղեկավար Սվետլանա Կամբուլովան հայտնել է, որ վնասված հինգ օբյեկտների տարածքում (ներառյալ երկու ձեռնարկություն) «տեղական արտակարգ դրության (ԱԴ) ռեժիմ» է մտցվում։

Ընդհանուր առմամբ, ինչպես հայտնել է Ռուսաստանի պաշտպանության նախարարությունը, գիշերվա ընթացքում խոցվել է ուկրաինական 11 անօդաչու թռչող սարք, որոնց մեծ մասը՝ Ռոստովի մարզի երկնքում։