Նախընտրելի
Ներկայացուցիչների պալատի վերահսկիչ հանձնաժողովը մտադիր է քրեական գործ հարուցել ԱՄՆ նախկին պետքարտուղար Հիլարի Քլինթոնին Կոնգրեսի նկատմամբ անհարգալից վերաբերմունքի մեջ ճանաչելու համար, քանի որ նա չի ներկայացել ֆինանսիստ Ջեֆրի Էպշտեյնի գործով հանրապետականների գլխավորևած հանձնաժողովի հետաքննության շրջանակում փակ դռների ետևում անցկացվելիք լսումներին, հաղորդում է NBC News-ը։
Այս մասին չորեքշաբթի հայտարարել է Հանձնաժողովի նախագահ Ջեյմս Քոմերը։
Այս որոշումն ընդունվել է Քոմերի հայտարարությունից մեկ օր անց, ըստ որի հանձնաժողովը մտադիր է Կոնգրեսի նկատմամբ ԱՄՆ նախկին նախագահ Բիլ Քլինթոնի վերաբերմունքն անհարգալից ճանաչել՝ երեքշաբթի օրը նախատեսված լսումներին չներկայանալու համար։
«Մենք երկու Քլինթոններին էլ մեղավոր ենք ճանաչելու Կոնգրեսի նկատմամբ քրեական անհարգալից վերաբերմունքի համար»,- չորեքշաբթի առավոտյան լրագրողներին հայտարարել է Քոմերը։
Ըստ նրա՝ Վերահսկիչ հանձնաժողովը հաջորդ չորեքշաբթի կքվեարկի երկու բանաձևերի շուրջ, որից հետո դրանք կներկայացվեն Ներկայացուցիչների պալատի քննարկմանը։
Քոմերը նշել է, որ հանձնաժողովը հինգ ամիս «բարեխիղճ» բանակցություններ է վարել Քլինթոնների փաստաբանների հետ։
«Մենք արել ենք այն ամենը, ինչ կարող էինք»,- ընդգծել է նա։
Կոմիտեն անցյալ տարի Քլինթոններին դատական ծանուցագրեր էր ուղարկել։ Նրանց ցուցմունքը սկզբում նախատեսված էր հոկտեմբերին, սակայն հետագայում հետաձգվեց դեկտեմբեր՝ հուղարկավորությանը մասնակցելու պատճառով։ Քոմերի խոսքով՝ Քլինթոնների փաստաբանը չի կարողացել այլընտրանքային ամսաթվեր առաջարկել, որից հետո հանձնաժողովը լսումները հետաձգել է հունվարի կեսերին։
