Նախընտրելի
Հայաստանի Հանրապետության երկրորդ նախագահ Ռոբերտ Քոչարյանը լրագրողներին հայտնել է, որ այլեւս «Սիստեմա» ԱՖԿ տնօրենների խորհրդի անդամ չէ։ Այս մասին նա հայտնել է այսօր՝ հունվարի 29-ին, լրագրողների հետ հանդիպման ժամանակ։
«Ես հրաժարվել եմ անդամակցությունից 2021թ․ խորհրդարանական ընտրությունների նախօրեին։ «Սիստեմա» ԱՖԿ-ում պետք է անցկացվեր բաժնետերերի ժողով, եւ ես խնդրել եմ, որ իմ թեկնածությունը չվերաառաջադրվի, քանի որ մտադիր եմ մասնակցել Հայաստանի խորհրդարանական ընտրություններին»,- հայտնել է Քոչարյանը։ Նա նշել է, որ «Սիստեմա» ԱՖԿ-ի բաժնետեր է, ինչը նշված է նաեւ 2021թ․ ընտրությունների նախօրեին իր ներկայացրած եկամուտների հայտարարագրում։
Քոչարյանը նաեւ խոստովանել է, որ տիրապետում է աննշան տոկոսի՝ 0.03 տոկոսի։ Երկրորդ նախագահը նաեւ բացատրել է, թե ինչպես է ձեռք բերել ընկերության բաժնետոմսերը։ «Ես 12 տարի անկախ տնօրեն էի։ Ընթացակարգը հետեւյալն էր. կատարված աշխատանքի համար վճարման մի մասը կատարվում էր բաժնետոմսերով, իսկ մյուս մասը՝ կանխիկ։ Բաժնետոմսերը մինչ օրս պահպանվում են։ Սակայն բաժնետոմսերի տոկոսը շատ փոքր է, քանի որ խոսքը շատ մեծ ընկերության մասին է։ Որպեսզի պատկերացում կազմեք մասշտաբի մասին, կասեմ հետեւյալը. ընկերությունը տիրապետում է 200-250 հազար հեկտար գյուղատնտեսական հողատարածքների եւ մոտ 150 բժշկական կենտրոնի, դա ավելին է, քան ամբողջ Հայաստանում։ Այսինքն՝ դա հսկայական ընկերություն է, եւ ես այնտեղ աշխատել եմ 12 տարի։ Եվ ուզում եմ ասել, որ բացի պետական կառավարման ոլորտում իմ ունեցած փորձից՝ որպես Արցախի նախագահ, վարչապետ եւ Հայաստանի նախագահ, ես ձեռք եմ բերել շատ արժեքավոր կորպորատիվ կառավարման փորձ։ «Կարո՞ղ եք նշել Հայաստանում որեւէ մեկին, ով նմանատիպ փորձ ունի»,- հարցրել է Քոչարյանը։
Նա նշել է, որ իր ունեցած ինքնատիպ փորձը կարող է ծառայել հօգուտ պետության բարեկեցության։
