«Մենք վերջապես պետք է հասկանանք, որ Հայաստանի ներկա կառավարությունը դարձել է «խաղաղության», վախի եւ ժամանակավոր հրադադարի վաճառող»։ Այս մասին «Հայաստանի Հանրապետության եւ Հայկական աշխարհի անվտանգությանը սպառնացող գործոնները» թեմայով բանավեճի ժամանակ, հունվարի 30-ին ասել է «Մայր Հայաստան» կուսակցության առաջնորդ Անդրանիկ Թեւանյանը։

Ընդդիմադիր գործչի խոսքով՝ կառավարությունը փորձում է ապահովել իր վերընտրությունը վախի եւ այսպես կոչված խաղաղության միջոցով Ադրբեջանի եւ Թուրքիայի հետ։

«Դրանից հետո նրանք կշարունակեն իրականացնել ադրբեջանա-թուրքական նախապայմանները, քանի որ սա նրանց համար միակ միջոցն է պահպանելու իրենց ունեցած դիրքերը եւ իրենց մաշկը»,- ասել է Թեւանյանը։

Նա համոզված է, որ այս կառավարությունը վախենում է նույն ճակատագրին արժանանալ, ինչ Վրաստանի նախկին նախագահ Միխայիլ Սաակաշվիլին։

«Հենց այս պատճառով՝ վախից դրդված, նրանք ձեռնարկում են գործողություններ, որոնք Հայաստանին մղում են անընդհատ աճող խնդիրների։ Մենք պետք է հստակ եւ անկեղծորեն բացատրենք մեր հանրությանը, թե որոնք են այդ ադրբեջանա-թուրքական նախապայմանները»,- հայտնել է քաղաքական գործիչը։

Նա ստեր որակեց այն պնդումները, թե Երեւանի եւ Բաքվի միջեւ ուղիղ բանակցություններ են ընթանում առանց միջնորդների մասնակցության։

«Իրականում կա միջնորդ, եւ դա Թուրքիան է։ Կա նաեւ պահանջներ ներկայացնող մեկը, եւ դա Ադրբեջանն է։ Հայաստանը պարզապես գործում է որպես այս բանակցությունների եւ հարաբերությունների օբյեկտ։ Այսինքն՝ այն բավարարվում է միայն ադրբեջանա-թուրքական նախապայմաններով»,- նշել է ընդդիմադիր գործիչը։